Maxsus matodan tikiladi, kompyuterda ranglanib, 60 metr balandlikka o‘rnatiladi — Qiziltepa obodonlashtirish boshqarmasi 71 mln so‘mlik bayroqlar haqida

Navoiy viloyati Qiziltepa tuman obodonlashtirish boshqarmasi umumiy narxi 71 million 180 ming so‘mlik 4 ta O‘zbekiston bayrog‘ini xarid qilgani haqida xabar qilingan edi. Obodonlashtirish boshqarmasi “Daryo”da e’lon qilingan materialga munosabat bildirdi.

Boshqarma munosabatida aytilishicha, bayroq 8x16 metr o‘lchamda ekani va u tuman markazidagi 60 metr balandlikdagi flagshtokka ilinishi inobatga olinishi lozim. 

Boshqarma bayroq oddiy rangli matodan emas, maxsus matodan tikilib, kompyuter yordamida ranglanishini ta’kidlagan. Shuningdek, bayroq quyosh nurlari, kuchli shamol va namgarchiliklarga chidamli qilib tayyorlanishi ko‘zda tutilgan.

“Ma’lumot tarqatishda qaysidir mahsulotning faqatgina nomiga emas, xususiyatlariga ham e’tibor qaratish lozim deb o‘ylaymiz”, — deyiladi xabarda.

Qayd etish kerakki, “Daryo” mazkur maqolani tayyorlashda lot sahifasiga biriktirilgan ma’lumotlardan foydalangan. Ushbu sahifada lotning texnik ko‘rsatkichlari aks etmagan edi.