Навоийда бир нечта ноқонуний фаолият олиб бораётган оҳак пишириш цехлари фаолияти тўхтатилди, деб хабар бермоқда Табиат ресурслари вазирлиги матбуот хизмати.
Вазирликнинг Навоий вилояти бошқармасига Навоий шаҳрининг “Бунёдкор”, “Бинокор” МФЙ, “Ишчилар” қўрғони, Садриддин Айний кўчаси ҳамда вокзал ҳудуди аҳолисидан мурожаат келиб тушган.
Мурожаатларни ўрганиш мақсадида вилоят бошқармаси томонидан Кармана тумани табиат ресурлари инспекцияси, туман давлат солиқ инспекцияси, туман фавқулодда вазиятлар бошқармаси, туман қурилиш бўлими, туман санитария эпидемологик осойишталик ва жамоат саломатлиги бўлими, Кадастр агентлиги туман бўлими, “Янги ариқ” МФЙ раиси ҳамда маҳалла профилактика инспектори томонидан ишчи гуруҳ тузилиб, Кармана туманидаги “Янги ариқ” МФЙ ҳудудида фаолият юритаётган оҳак пишириш цехларининг фаолияти ўрганилган.
Ўрганиш давомида Кармана тумани “Янги ариқ” МФЙ ҳудудидаги оҳак пишириш цехларида мониторинг кузатуви ўтказилиб, таҳлил қилинган. Таҳлил натижаларига кўра, атмосфера ҳавосига водород сулфиди, формалдегид, углерод оксиди, олтингугурт, қўш оксидлари каби заҳарли моддалар меъёридан ортиқ чиқарилаётгани аниқланган.
Шунингдек, ҳудудлардаги оҳак ишлаб чиқариш цехлари хатловдан ўтказилганда Кармана ва Қизилтепа туманида яшовчи фуқароларга қарашли оҳак ишлаб чиқариш цехлари ҳам ноқонуний тарзда фаолият юритиб келаётгани маълум бўлган.
Ҳолат юзасидан Маъмурий жавобгарлик тўғрисидаги кодекснинг тегишли моддаларига асосан маъмурий иш қўзғатилган. Шунингдек, цех фаолияти кўрсатиб ўтилган ҳолатлар бартараф этилгунига қадар вақтинча тўхтатилган.
Бундан ташқари, Кармана тумани ҳудудида фаолият юритаётган оҳак ишлаб чиқариш цехлари — “Шахбоз Навоий”, “Gold Cheken Farm”, “Ҳамид Акром Келажаги Сервис”, “Имрон Кармана Навоий” масъулияти чекланган жамиятларига ҳамда фуқаролар Д.Б, Б.А, Т.Ф, К.Т.га тегишли тартибда чанг-газ тозалаш ускуналарини ўрнатиш тўғрисида огоҳлантириш хатлари берилган.
Изоҳ (0)