Farg‘ona viloyati Uchko‘prik tumanida YPX xodimi Spark oynasini urib sindirgani to‘g‘risida xabar berilgandi. Viloyat IIB YHXBning ma’lum qilishicha, inspektorning qonuniy talabiga bo‘ysunmagan haydovchiga 5 sutka mamuriy qamoq jazosi tayinlangan.
Ma’lum qilinishicha, 14-aprel kuni Bekobod qishlog‘ida davlat raqam belgisiz, yon oynalari tusi o‘zgartirilgan Spark harakatlanib borayotgani haqida xabar kelib tushgan. Shundan so‘ng inspektor A.A. avtomobilni to‘xtatish choralarini ko‘rgan. Lekin haydovchi J.J xodimning to‘xtash va avtomashinadan tushish haqidagi qonuniy talablariga bo‘ysunmagan.
Ushbu vaziyatda inspektor buyruq talablariga asosan kuch ishlatib, avtomobil oynasini sindirib, haydovchini to‘xtatib qolgan. Mazkur holat yuzasidan haydovchiga nisbatan Ma’muriy javobgarlik to‘g‘risidagi kodeksning tegishli moddalari bilan hujjatlar rasmiylashtirilib, avtomobil jarima maydoniga joylashtirilgan.
To‘plangan hujjatlar holatga qonuniy baho berish uchun jinoyat ishlari bo‘yicha Uchko‘prik tuman sudiga yuborilgan.
“Ko‘chaning boshidagi ustaxonaga chiqib, nomerni qo‘yib olaman degandim. Yarim kilometr yurganimdan keyin to‘xtatishdi, to‘xtadim. Qo‘rqib ketganimdan eshikni ochmasdan, oynani tushirib gaplashdim”, — deydi huquqbuzar.
Haydovchi Ma’muriy javobgarlik to‘g‘risidagi kodeksning 183-(mayda bezorilik) hamda 194-moddalari (Ichki ishlar organlari xodimining qonuniy talablarini bajarmaslik) bilan 5 sutka ma’muriy qamoq jazosi tayinlandi.
Izoh (0)