Samarqand viloyatida yo‘l-transport hodisasini sodir etgan mashinalarni noqonuniy, tegishli ruxsatnomalarsiz sozlash bilan shug‘ullanayotgan ustaxonalar aniqlandi. Bu haqda Yo‘l harakati xavfsizligi boshqarmasi axborot xizmati xabar berdi.
Xabarga ko‘ra, Samarqand shahridagi avtoustaxonalarda Ichki ishlar organlari faoliyatini muvofiqlashtirish boshqarmasi, YHX xodimlari tomonidan reyd tadbirlari o‘tkazildi. Bunda asosiy eʼtibor YTH sodir etib, taʼmirga muhtoj mashinalar hududiy yo‘l harakati xavfsizligi boshqarmasi tomonidan tegishli maʼlumotnoma taqdim etilgandagina unga texnik xizmat ko‘rsatilishi masalasiga qaratildi.
Ushbu holatlarga amal qilmagan bir necha mashina yo‘l-patrul xizmati xodimlari tomonidan aniqlandi. Ayrim haydovchilar yo‘l-transport hodisalari sodir etib, voqea joyidan qochib ketish holatlarini sodir etgan. Aniqlangan holatlar bo‘yicha tegishli ruxsatnomalarsiz taʼmirlanayotgan avtomashinalar jarima maydonchasiga joylashtirildi.
Taʼmirga muhtoj va shubhali mashina uchun hududiy yo‘l harakati xavfsizligi bo‘limi tomonidan tegishli maʼlumotnoma taqdim etilganda, ularga texnik xizmati ko‘rsatish lozimligi tavsiya etildi.
Izoh (0)