Paparatsilar uch karra “Oskar” mukofoti sovrindori Jek Nikolsonni bir yarim yil ichida birinchi marta suratga oldi, deb xabar bermoqda “Pravila jizni” nashri.
Avvalroq ommaviy axborot vositalari aktyorga aqli zaiflik tashxisi qo‘yilgani haqida yozgan va uning atrofidagi manbalar Nikolson o‘ziga xos turmush tarzini olib bora boshlagani, deyarli uydan chiqmasligidan xavotirda ekanligini xabar qilgan edi. Ma’lum bo‘lishicha, aktyor yaqinlari qaramog‘ida.
Yangi suratlarda aktyorning Los-Anjelesdagi uyi balkonda uyqusirab turgani aks etgan. Jurnalistlar aktyor qanday qilib qushlar sayrashini tinglayotgani va vertolyotni tomosha qilayotganini suratga olgan.
Nikolson oxirgi marta 2021-yilning oktabr oyida omma oldida ko‘rinish bergan. O‘sha paytda aktyor o‘g‘li bilan birga Los-Anjeles Leykers basketbol jamoasining o‘yinini tomosha qilgan.
Ma’lumot uchun, Jek Nikolson 1937-yilning 22-aprelida AQSHning Nyu-Jersi shtatida tug‘ilgan. U kino tarixidagi eng buyuk aktyorlardan biri hisoblanadi. Aktyor 12 marta “Oskar” mukofotiga nomzod bo‘lib, uch marta g‘alaba qozongan. Jek Nikolson 57 yoshida Amerika kino instituti mukofotini olgan eng yosh aktyorlardan biriga aylandi. Uning ishtirokidagi “Betmen”, “Toki hayot ekanmiz”, “So‘nggi tafsilot”, “Kakku uyasi uzra parvoz” kinokartinalari tomoshabinlar e’tirofiga sazovor bo‘lgan.
Izoh (0)