Shavkat Mirziyoyevning Turkmaniston Milliy yetakchisi, Xalq Maslahati raisi Gurbanguli Berdimuhamedov bilan telefon orqali muloqoti bo‘lib o‘tdi. Bu haqda Prezident matbuot xizmati xabar berdi.
Muloqot davomida dastlab davlat rahbari Gurbanguli Berdimuhamedovga og‘ir judolik — onasi Ogulabat edje Berdimuhamedova olamdan o‘tgani munosabati bilan chuqur hamdardlik va taskin-tasalli so‘zlarini izhor etdi, unga va barcha yaqinlariga sabr-toqat va bardosh tilagan.
Suhbatda ikki tomonlama kun tartibidagi dolzarb masalalar yuzasidan fikr almashilgan. Oliy darajadagi kelishuvlar ijrosining borishi muhokama qilingan. Yil boshidan buyon o‘tgan ikki tomonlama muloqotlar — Hukumatlararo komissiya yig‘ilishi, siyosiy maslahatlashuvlar, transport va madaniyat vazirlarining uchrashuvlari, diplomatik munosabatlar o‘rnatilganining 30 yilligi munosabati bilan o‘tkazilgan boshqa tadbirlarning samarali natijalari mamnuniyat bilan qayd etilgan.
“Savdo-iqtisodiy, energetika va suv xo‘jaligi sohalaridagi hamkorlik masalalari muhokama qilindi. Bundan tashqari, Markaziy Osiyoda mintaqaviy hamkorlikning amaliy jihatlari ko‘rib chiqildi”, — deyiladi xabarda.
Shuningdek, O‘zbekiston—Turkmaniston strategik sheriklik munosabatlarini yanada mustahkamlash bo‘yicha faol almashinuvlarni davom ettirishga kelishib olingan.
Telefon muloqoti yakunida yetakchilar bir-birini va qardosh mamlakatlar xalqlarini yaqinlashib kelayotgan Ramazon hayiti bilan dildan qutlagan.
O‘zbekiston prezidenti, shuningdek, Turkmaniston prezidenti Serdar Berdimuhamedovga ham buvisining vafoti munosabati bilan hamdardlik bildirdi.
Suhbatda O‘zbekiston—Turkmaniston strategik sheriklik munosabatlarini yanada mustahkamlash hamda oliy darajadagi kelishuvlarga muvofiq amaliy hamkorlikni kengaytirish masalalari ko‘rib chiqilgan. Yaqinda o‘tkazilgan Hukumatlararo komissiya yig‘ilishi, tashqi siyosiy idoralar, transport, madaniyat vazirliklari doirasidagi uchrashuvlar va boshqa tadbirlarning samarali natijalari ijobiy baholangan.
Savdo-iqtisodiy hamkorlik masalalari, eng avvalo, Shovot—Toshovuz chegaraoldi savdo sonasini tashkil etish, iqtisodiyotning ustuvor tarmoqlarida kooperatsiya loyihalarini amalga oshirish, faol madaniy-gumanitar almashinuvlarni davom ettirishga alohida eʼtibor qaratilgan.
O‘g‘ulobod Berdimuhamedova 7-aprel kuni 86 yoshida vafot etdi. Shavkat Mirziyoyev Gurbanguli Berdimuhamedovga uning onasi vafot etgani munosabati bilan hamdardlik bildirgandi. O‘g‘ulobod Berdimuhamedova vafot etgani munosabati bilan mamlakatda 15-aprelga qadar barcha to‘y tadbirlari bekor qilindi va banket zallarining ishi to‘xtatilgan.
Izoh (0)