Шавкат Мирзиёев Гурбангули Бердимуҳамедов билан телефон орқали мулоқот қилди

Шавкат Мирзиёевнинг Туркманистон Миллий етакчиси, Халқ Маслаҳати раиси Гурбангули Бердимуҳамедов билан телефон орқали мулоқоти бўлиб ўтди. Бу ҳақда Президент матбуот хизмати хабар берди.

Мулоқот давомида дастлаб давлат раҳбари Гурбангули Бердимуҳамедовга оғир жудолик — онаси Огулабат эдже Бердимуҳамедова оламдан ўтгани муносабати билан чуқур ҳамдардлик ва таскин-тасалли сўзларини изҳор этди, унга ва барча яқинларига сабр-тоқат ва бардош тилаган.

Суҳбатда икки томонлама кун тартибидаги долзарб масалалар юзасидан фикр алмашилган. Олий даражадаги келишувлар ижросининг бориши муҳокама қилинган. Йил бошидан буён ўтган икки томонлама мулоқотлар — Ҳукуматлараро комиссия йиғилиши, сиёсий маслаҳатлашувлар, транспорт ва маданият вазирларининг учрашувлари, дипломатик муносабатлар ўрнатилганининг 30 йиллиги муносабати билан ўтказилган бошқа тадбирларнинг самарали натижалари мамнуният билан қайд этилган.

“Савдо-иқтисодий, энергетика ва сув хўжалиги соҳаларидаги ҳамкорлик масалалари муҳокама қилинди. Бундан ташқари, Марказий Осиёда минтақавий ҳамкорликнинг амалий жиҳатлари кўриб чиқилди”, — дейилади хабарда.

Шунингдек, Ўзбекистон—Туркманистон стратегик шериклик муносабатларини янада мустаҳкамлаш бўйича фаол алмашинувларни давом эттиришга келишиб олинган.

Телефон мулоқоти якунида етакчилар бир-бирини ва қардош мамлакатлар халқларини яқинлашиб келаётган Рамазон ҳайити билан дилдан қутлаган.

Ўзбекистон президенти, шунингдек, Туркманистон президенти Сердар Бердимуҳамедовга ҳам бувисининг вафоти муносабати билан ҳамдардлик билдирди.

Суҳбатда Ўзбекистон—Туркманистон стратегик шериклик муносабатларини янада мустаҳкамлаш ҳамда олий даражадаги келишувларга мувофиқ амалий ҳамкорликни кенгайтириш масалалари кўриб чиқилган. Яқинда ўтказилган Ҳукуматлараро комиссия йиғилиши, ташқи сиёсий идоралар, транспорт, маданият вазирликлари доирасидаги учрашувлар ва бошқа тадбирларнинг самарали натижалари ижобий баҳоланган.

Савдо-иқтисодий ҳамкорлик масалалари, энг аввало, Шовот—Тошовуз чегараолди савдо сонасини ташкил этиш, иқтисодиётнинг устувор тармоқларида кооперация лойиҳаларини амалга ошириш, фаол маданий-гуманитар алмашинувларни давом эттиришга алоҳида эътибор қаратилган.

Ўғулобод Бердимуҳамедова 7 апрель куни 86 ёшида вафот этди. Шавкат Мирзиёев Гурбангули Бердимуҳамедовга унинг онаси вафот этгани муносабати билан ҳамдардлик билдирганди. Ўғулобод Бердимуҳамедова вафот этгани муносабати билан мамлакатда 15 апрелга қадар барча тўй тадбирлари бекор қилинди ва банкет залларининг иши тўхтатилган.