Futbol bo‘yicha Yevropa Chempionlar Ligasining chorak final dastlabki bahsi doirasidagi “Real” o‘z uyida “Chelsi”ni 2:0 hisobida mag‘lub etdi.
O‘yinga oid statistika va faktlar
Madridliklar Chempionlar Ligasi doirasidagi uy o‘yinida ketma-ket 31-marta gol urishga muvaffaq bo‘ldi. So‘nggi bor “Santyago Bernabeu”da to‘p o‘tkazib yubormagan jamoa “Barselona” bo‘lgandi, katalonlar bu ishni 2010/11-yilgi mavsumda uddalagan.
“Chelsi” so‘nggi beshta o‘yinning 3 tasini boy berdi va 2 tasida durang o‘ynadi. Ularning to‘rttasida “ko‘klar” gol urolmadi. Frenk Lempard qaytganidan keyingi ikkita o‘yinda “Chelsi” gol urmasdan mag‘lub bo‘ldi.
London klubi 1993-yildan beri ilk bor ketma-ket to‘rtta o‘yinda gol urolmadi. 1993-yilning noyabrida jamoa uch marta mag‘lub bo‘lgan va bitta durang qayd etgandi.
“Chelsi” joriy mavsum barcha musobaqalar doirasida g‘alabaga qaraganda mag‘lubiyat ko‘proq qayd etdi — 16 mag‘lubiyat, 15 g‘alaba va 10 durang. To‘plar nisbati ham manfiy ko‘rinishga ega — 41:44.
Individual raqamlar
Karlo Anchelotti “Real” boshqaruvida musobaqadagi 35-g‘alabasini tantana qildi (47 ta o‘yinda). Bu borada italiyalik mutaxassis Visente del Boskeni (60 o‘yinda 34 g‘alaba) ortda qoldirib, rekordchiga aylandi. Anchelotti “Real” bilan ikkita YCHL bosh sovriniga ega chiqqan.
Madridliklar forvardi Karim Benzema Chempionlar Ligasidagi 90-golini urdi (149 o‘yinda). Ularning 56 tasi guruh bosqichida urilgan bo‘lsa, 17 — 1/8 finalda, 8 — chorak finalda, 8 — yarim finalda va bitta finalda kiritilgan. Bu borada faqat uch futbolchi Karimdan oldinda: Krishtianu Ronaldu (140), Lionel Messi (129) va Robert Levandovski (91).
Benzema YCHLdagi so‘nggi 11 ta golining barchasini ingliz klubiga urdi: “Chelsi” (5), “Manchester Siti” va “Liverpul” (3 tadan).
Benzema 2023-yildagi gollari sonini 18 taga yetkazib olgan holda bu borada Erling Holandga yetib oldi. Bu hozircha top-5 ligalar futbolchilari uchun eng yaxshi natija bo‘lib turibdi.
“Real” vingeri Marko Asensio Chempionlar Ligasida zaxiradan tushib gol urish bo‘yicha o‘ziga tegishli rekordni yangilab oldi — 9. Ole-Gunnar Sulsher, Karim Benzema va Tomas Myullerda 7 tadan gol bor.
“Chelsi” vakili Joau Feliks “Real”ga qarshi faoliyatidagi 7-o‘yinda ishtirok etdi. Unda Feliksning jamoalari 4 marta yutqazgan va 3 bor durang o‘ynagan. Portugaliyalik mazkur bahslarda birorta samarali harakat amalga oshira olmagan.
Izoh (0)