“Liverpul” Dortmundning “Borussiya” klubi futbolchisi Jud Bellinghem uchun kurashdan chiqdi. Bu haqda The Telegraph xabar berdi.
Xabarga ko‘ra, mersisaydliklar Bellinghemning narxi tufayli uni sotib olish fikridan qaytgan. Qayd etilishicha, transfer futbolchining maoshidan tashqari 115 million funt sterlingdan ko‘proqqa tushadi. Bu “Liverpul” yozgi budjetining asosiy qismi hisoblanadi.
“Liverpul” uning o‘rniga har bir chiziqni kuchaytirishga e’tibor qaratadi. “Qizillar” Bellinghem o‘rniga e’tiborini “Chelsi” vakillari Meyson Maunt va Konor Gallaher, “Brayton” a’zosi Moyses Kaysedo hamda “Bavariya” futbolchisi Rayan Gravenberh kabi o‘yinchilarga qaratadi.
Bosh murabbiy Yurgen Klopp rahbariyatning qarorini qo‘llab-quvvatlamoqda. Germaniyalik mutaxassis tarkibni kuchaytirish borasidagi ishlar tezda o‘z samarasini berishini istamoqda va shu bois kelishi mavhum bo‘lgan futbolchi uchun uzundan uzoq kurashga qo‘shilmoqchi emas.
Bellinghem uchun esa Madridning “Real” klubi asosiy da’vogarga aylandi. Madrid klubi ehtimoliy transferga limit qo‘ydi. “Qaymoqranglilar” Dortmund klubiga bonuslar bilan birga 100 million yevro to‘lashga tayyor. Bu summa 130—150 milliongacha borishi mumkin.
Angliyalik iqtidor egasiga “Chelsi”, “PSJ” va “Manchester Siti” ham befarq emas. Biroq bu klublar Bellinghem uchun qiziq emas.
19 yoshli futbolchining dortmundliklar bilan amaldagi shartnomasi 2025-yilning yoziga qadar mo‘ljallangan.
Izoh (0)