Анчелотти дел Боскенинг рекордини янгилади, “Челси”да 30 йиллик антирекорд. “Реал” — “Челси” учрашуви рақамларда

Футбол бўйича Европа Чемпионлар Лигасининг чорак финал дастлабки баҳси доирасидаги “Реал” ўз уйида “Челси”ни 2:0 ҳисобида мағлуб этди.

Ўйинга оид статистика ва фактлар

Мадридликлар Чемпионлар Лигаси доирасидаги уй ўйинида кетма-кет 31 марта гол уришга муваффақ бўлди. Сўнгги бор “Сантьяго Бернабеу”да тўп ўтказиб юбормаган жамоа “Барселона” бўлганди, каталонлар бу ишни 2010/11 йилги мавсумда уддалаган.

“Челси” сўнгги бешта ўйиннинг 3 тасини бой берди ва 2 тасида дуранг ўйнади. Уларнинг тўрттасида “кўклар” гол уролмади. Фрэнк Лэмпард қайтганидан кейинги иккита ўйинда “Челси” гол урмасдан мағлуб бўлди.

Лондон клуби 1993 йилдан бери илк бор кетма-кет тўртта ўйинда гол уролмади. 1993 йилнинг ноябрида жамоа уч марта мағлуб бўлган ва битта дуранг қайд этганди.

“Челси” жорий мавсум барча мусобақалар доирасида ғалабага қараганда мағлубият кўпроқ қайд этди — 16 мағлубият, 15 ғалаба ва 10 дуранг. Тўплар нисбати ҳам манфий кўринишга эга — 41:44.

Индивидуал рақамлар

Карло Анчелотти “Реал” бошқарувида мусобақадаги 35-ғалабасини тантана қилди (47 та ўйинда). Бу борада италиялик мутахассис Висенте дел Боскени (60 ўйинда 34 ғалаба) ортда қолдириб, рекордчига айланди. Анчелотти “Реал” билан иккита ЕЧЛ бош совринига эга чиққан.

Мадридликлар форварди Карим Бензема Чемпионлар Лигасидаги 90-голини урди (149 ўйинда). Уларнинг 56 таси гуруҳ босқичида урилган бўлса, 17 — 1/8 финалда, 8 — чорак финалда, 8 — ярим финалда ва битта финалда киритилган. Бу борада фақат уч футболчи Каримдан олдинда: Криштиану Роналду (140), Лионель Месси (129) ва Роберт Левандовски (91).

Бензема ЕЧЛдаги сўнгги 11 та голининг барчасини инглиз клубига урди: “Челси” (5), “Манчестер Сити” ва “Ливерпуль” (3 тадан).

Бензема 2023 йилдаги голлари сонини 18 тага етказиб олган ҳолда бу борада Эрлинг Ҳоландга етиб олди. Бу ҳозирча топ-5 лигалар футболчилари учун энг яхши натижа бўлиб турибди.

“Реал” вингери Марко Асенсио Чемпионлар Лигасида захирадан тушиб гол уриш бўйича ўзига тегишли рекордни янгилаб олди — 9. Оле-Гуннар Сульшер, Карим Бензема ва Томас Мюллерда 7 тадан гол бор.

“Челси” вакили Жоау Феликс “Реал”га қарши фаолиятидаги 7-ўйинда иштирок этди. Унда Феликснинг жамоалари 4 марта ютқазган ва 3 бор дуранг ўйнаган. Португалиялик мазкур баҳсларда бирорта самарали ҳаракат амалга ошира олмаган.