Shavkat Mirziyoyev bir qator xorijiy davlat elchilaridan ishonch yorliqlarini qabul qilib oldi

Shavkat Mirziyoyev 12-aprel kuni bo‘lib o‘tgan tantanali marosimda favqulodda va muxtor elchilar — Falastin davlatidan Javad Avvad, Yaponiyadan Xatori Takashi, Qatar davlatidan Hasan Hamza Hoshim, Slovakiya respublikasidan Viktor Boreski va Pokiston respublikasidan Ahmad Farukning ishonch yorliqlarini qabul qilib oldi. Bu haqda Prezident matbuot xizmati xabar berdi.

Davlat rahbari mamlakatga yangi tayinlangan diplomatik missiyalar rahbarlarini samimiy qutlab, O‘zbekistondagi faoliyatini boshlagani bilan tabriklagan.

Prezident o‘z nutqida ochiq va pragmatik tashqi siyosatni amalga oshirayotgan Yangi O‘zbekiston xalqaro maydonda yangi marralarga erishayotgani, do‘stlar va ishonchli hamkorlar safini kengaytirayotganini taʼkidlagan. Mamlakatdagi yangilanishlar jarayoni to‘g‘risida so‘z yuritar ekan, O‘zbekiston yetakchisi keyingi yillarda inson—·jamiyat—davlat tamoyili asosida huquqiy demokratik davlatni barpo etish, erkin fuqarolik jamiyatini rivojlantirish borasida amalga oshirilayotgan islohotlarning mohiyati va maqsadlariga alohida to‘xtalgan.

Bunday keng ko‘lamli o‘zgarishlar mamlakatni tubdan isloh qilishni, kompleks siyosiy, iqtisodiy va maʼmuriy yangilanishlarni izchil olib borishni talab etadi. Konstitutsiyani Yangi O‘zbekiston voqeligiga mos ravishda yangilash jarayoni bu yo‘ldagi katta qadamdir. Prezident Shavkat Mirziyoyev asosiy qonunning yangi tahririni tayyorlash doirasida keng jamoatchilik muhokamasi o‘tkazilgani, tajribali mutaxassis va olimlar, xorijiy hamkorlar, ixtisoslashgan xalqaro institutlar va tahliliy markazlarning takliflari hisobga olinganini qayd etgan.

O‘zbekiston yetakchisi ziddiyatlar va mojarolar keskinlashib borayotgan murakkab xalqaro vaziyat sharoitida barcha mamlakatlar bilan o‘zaro ishonch va hurmatga asoslangan tashqi siyosatni amalga oshirishning ahamiyati tobora ortib borayotganini alohida taʼkidlagan.

“Xalqaro hamjamiyat uchun yanada ochiq va samimiy hamkor bo‘lishga astoydil intilamiz. Buning uchun bizda siyosiy iroda, qatʼiyat, eng muhimi, imkoniyat va yetarli salohiyat bor”, — deydi prezident.

Marosim davomida davlat rahbari yangi elchilar vakillik qilayotgan mamlakatlar bilan ko‘p qirrali va o‘zaro manfaatli hamkorlikni rivojlantirishning istiqbolli yo‘nalishlariga alohida to‘xtalib o‘tgan.

Tadbir doirasida har bir elchi bilan qisqa suhbat bo‘lib o‘tgan. Chet ellik diplomatlar ular vakillik qilayotgan mamlakatlar yetakchilarining O‘zbekiston rahbari va xalqiga samimiy salomi va ehtiromini yetkazgan. O‘zbekistonda ularning diplomatik faoliyatiga yaratilgan sharoitlar hamda bugungi tadbirda ko‘rsatilgan iliq qabul va alohida eʼtibor uchun chuqur minnatdorlik bildirdi.

Elchilar Shavkat Mirziyoyev tomonidan ilgari surilgan aniq taklif va tashabbuslar o‘zaro manfaatli munosabatlarni rivojlantirishda ulkan amaliy ahamiyatga ega ekanini hamda O‘zbekiston bilan keng ko‘lamli hamkorlik va samarali sheriklikni yanada rivojlantirishga bor kuch-g‘ayrati va tajribasini ishga solishga tayyorligini taʼkidlagan.