Qurilish va uy-joy kommunal xo‘jaligi vazirligi ijtimoiy tarmoqlarda tarqalgan Buxoro viloyatidagi qabriston yaqinida noqonuniy qurilish ishlari amalga oshirilayotgani aytilgan videoga munosabat bildirdi.
Ma’lum qilinishicha, viloyat Qurilish sohasida hududiy nazorat inspeksiyasi tomonidan Jondor tumani “Navgadi” MFY hududida “Evro Star Stroy” MCHJ tomonidan qurilishi boshlangan obyektda o‘rganish ishlari olib borilgan.
Ma’lumotlarga ko‘ra, belgilangan hududda savdo va maishiy xizmat ko‘rsatish majmuasi, kottej va ko‘p qavatli turar-joy binosi qurish uchun 10 000 metr kvadrat yer maydoni ajratilgan.
Mazkur obyekt qurilishi bosh rejada tasdiqlangan qizil chiziqdan chiqmagan holda “O‘zGASHKLITI” tashkilotining mutaxassislari tomonidan belgilab berilgan nuqtalar bo‘yicha olib borilmoqda. Ammo ishchi-quruvchilar uchun ovqatlanish, dam olish, yuvinish xonalari, shtab xonasi uchun vaqtinchalik yengil konstruksiyadan qurilgan 120 metr kvadrat maydondagi qurilmalar bosh rejada ko‘rsatilmagani bois noqonuniy deb topilgan.
“Pudrat tashkilotiga yengil konstruksiyalarni 15 kun muddatda bartaraf etish va yer maydonini dastlabki holatga keltirish yuzasidan ogohlantirish berildi”, — deyiladi munosabatda.
Avvalroq Toshkent shahar Shayxontohur tumanida qurilayotgan ko‘p qavatli uylardan biri qiyshiq qurilayotgani aytilgan video tarqalgandi. Qurilish va uy-joy kommunal xo‘jaligi vazirligi holatga munosabat bildirib, mazkur obyekt zamonaviy arxitektura namunasi sifatida o‘ziga xos dizayn asosida loyihalashtirilgani, bu bino konstruktiv elementlarida kamchiliklar borligini anglatmasligini ma’lum qildi.
11-aprel kuni esa Jurnalistika universitetining binolari orasida yoriq paydo bo‘lgani to‘g‘risida xabar berilgandi. Qurilish va uy-joy kommunal xo‘jaligi vazirligi holatga rasmiy munosabat bildirib, universitet binosidagi yoriqlar yuqori xavf darajasiga ega emasligini ma’lum qildi.
Izoh (0)