Xalqaro Valyuta Jamg‘armasi global iqtisodiyotning yuqori inflyatsiyani saqlab qolgan holda “qattiq qo‘nishi” haqida ogohlantirdi.
Bu markaziy banklarni asosiy stavkalarni ko‘tarishga undaydi. Buning oqibatlari moliyaviy sektor uchun jiddiy bo‘ladi.
Jahon iqtisodiyoti, yangi prognozga ko‘ra, joriy yilda 2,8 foizga, kelasi yilda esa 3 foizga o‘sadi.
XVJ iqtisodchilari Ukrainadagi urushning kuchayishi Yevropada energetika inqirozini keltirib chiqarishi va daromadi past mamlakatlarda oziq-ovqat muammosini yanada kuchaytirishi mumkinligini ta’kidlagan.
O‘tgan qishda gaz inqirozining oldi olingan bo‘lsa-da, yonilg‘i narxining keskin oshishi xavfi saqlanib qolmoqda.
XVJ tomonidan O‘zbekiston iqtisodiyoti 2023-yilda 5,3 foizga o‘sishi prognoz qilinmoqda. Bu Markaziy Osiyo davlatlari orasida kutilayotgan eng yuqori iqtisodiy o‘sish hisoblanadi.
2023-yilda Qozog‘iston iqtisodiyoti 4,3 foizga, Qirg‘iziston 3,5 foizga, Tojikiston 5 foizga, Turkmaniston 2,3 foizga o‘sishi kutilmoqda.
Rossiya va G‘arbda vaziyat qanday?
XVJ hisob-kitoblariga ko‘ra, Rossiya iqtisodiyoti joriy yilda 0,7 foizga o‘sadi. Tashkilot yanvarda Rossiya iqtisodiy o‘sishini 0,4 foizga baholagan edi.
Mamlakat urushdan keyingi sanksiyalar oqibatini kutilganidan yaxshiroq yengib o‘tmoqda.
XVJ 2023-yilda Germaniya iqtisodiyoti 0,1 foizga, Buyuk Britaniya iqtisodiyoti 0,3 foizga qisqarishini kutmoqda. Har ikkala davlat ham AQSH va boshqa Yevropa davlatlari kabi Rossiyaga qarshi sanksiyalar kiritgan.
Ukraina iqtisodiyoti joriy yilda atigi 3 foizga qisqarishi kutilmoqda. Bank inqirozi oqibatlari bilan kurashayotgan AQSH iqtisodiyoti esa 1,6 foizga o‘sishi prognoz qilinmoqda.
Izoh (0)