Joriy yilning oktabr oyida o‘tkazilgan so‘rov natijalariga ko‘ra, aholi tomonidan sezilgan inflyatsiya darajasi biroz pasayib 14 foizni tashkil etdi. Bu haqda Markaziy bank infografika taqdim etdi.
Ma’lumotlarga ko‘ra, yanvar oyida aholi tomonidan o‘rtacha 19,5 foiz inflyatsiya sezilgan. O‘shanda rasmiy inflyatsiya darajasi 12,2 foiz bo‘lgan edi.
Bu davrda 21—25 foiz inflyatsiyani sezgan aholi eng katta ulushni, 31 foizdan yuqori inflyatsiyani sezganlar esa keyingi o‘rinni egallagan. Shundan so‘ng, fevralda o‘rtacha ko‘rsatkich 14,9 foizgacha pasaygan.
Mart oyida aholining 43,1 foizi asosan meva va sabzavotlar narxining o‘sganini qayd etgan. Go‘sht va sut narxi oshganini ta’kidlaganlar ulushi ham yuqori — 37,2 foiz. Keyingi o‘rinda esa 28,5 foiz aholi shakar va qandolat mahsulotlarining narxi yuqori darajada o‘sgan deb topgan.
Faoliyat sohalari kesimida ko‘rib chiqilsa, mart oyida eng katta inflyatsiyani pensionerlar sezgan — 15 foizdan ortiq. Undan keyingi o‘rinda ishlab chiqarish va OAV xodimlari (15 foiz) joylashgan.
Hududlar kesimida esa eng ko‘p Toshkent shahrida aholi narxlar oshganini qayd etgan — 16 foiz. Keyingi o‘rinlarda Buxoro (15,7 foiz), Xorazm va Samarqand (14,8 foiz) viloyatlarida inflyatsiya darajasi yuqoriligi qayd etilgan.
Eng kam inflyatsiya darajasi esa Surxondaryo (11,5 foiz) va Qoraqalpog‘istonda (11,2 foiz) qayd etilgan.
Avvalroq O‘zbekistonda valyuta kursining o‘sishi inflyatsiyaga bosim ko‘rsatishi kutilayotgani haqida xabar berilgandi.
Biznesmenlar va aholining yarmi narxlar oshishiga valyuta kursining o‘zgarishi asosiy omil bo‘lishini ta’kidlagan (mos ravishda 51 va 50 foiz).
Ularning uchdan biri ish haqi va nafaqalarning oshishi kelgusi bir yilda narxlar oshishiga ta’sir ko‘rsatishini kutmoqda (mos ravishda 38 va 34 foiz).
Izoh (0)