Хоразмда оилавий болалар уйи раҳбари уч нафар вояга етмаган тарбияланувчини 10 ой давомида вилоят адлия бошқармаси ва туман фавқулодда вазиятлар бўлими бошлиқлари билан жинсий алоқада бўлишга мажбурлагани ҳақида хабар берилганди. Олий суд матбуот хизматининг маълум қилишича, айбланувчиларга нисбатан жиноят иши Тошкент шаҳар судида кўриб чиқилади.
Хабарга кўра, Олий суд жиноят ишлари бўйича судлов ҳайъати кассация инстанциясининг 6 апрелдаги ажрими билан Хоразм вилоят суди жиноят ишлари бўйича судлов ҳайъати аппеляция инстанциясининг 2022 йил 27 декабрдаги ажримининг А.М. ва А.Қ.га оид қисмини бекор қилган. Ишни янгидан аппеляция инстанцияси судида кўриш учун юбориш тўғрисидаги Хоразм вилоят прокуратурасининг кассация тартибидаги протести қаноатлантирилган. Ушбу жиноят иши янгидан аппеляция инстанция судида кўриш учун юборилиши белгиланган.
Жиноят-процессуал кодексининг 393-моддасига (жиноят ишининг судловга тегишлилигига кўра ўтказилиши) асосан ушбу жиноят иши аппеляция тартибида янгидан кўриб чиқиш учун Тошкент шаҳар судига юборилгани маълум қилинди.
Қайд этилишича, Жиноят-процессуал кодексининг 19-моддаси (судда жиноят ишларининг ошкора кўрилиши) талабларига мувофиқ, мазкур жиноят иши ёпиқ суд мажлисида кўриб чиқилиб, қўшимча маълумот суд жараёни якуни бўйича берилади.
Аввалроқ ушбу ҳолат юзасидан муносабат билдирган Президент администрацияси шўба мудири Саида Мирзиёева қонунчиликда жиддий муаммолар борлиги ва ушбу бўшлиқдан жирканч шахслар фойдаланиб қолаётганини алоҳида қайд этиб, Бош прокуратурадан мазкур ҳолатга алоҳида эътибор қаратиб, синчиклаб ўрганишни ва ҳуқуқий баҳо беришни сўраганди.
Президент администрацияси раҳбари ўринбосари Комил Алламжонов педофилларга нисбатан кимёвий кастрация жазосини қўллаш юзасидан қонунчиликка ўзгартириш киритиш вақти келганини айтганди.
Болалар омбудсмани ҳам меҳрибонлик уйи қизларига нисбатан қўлланадиган ҳар қандай жинсий жиноятларга оғир жазо турларини қўллаш керак, деган позицияда.
Изоҳ (0)