Ijtimoiy tarmoqlarda Qashqadaryo viloyatining Qamashi tumanida joylashgani va ayni kunda ham aholiga tibbiy xizmat ko‘rsatib kelayotgani aytilgan qarovsiz, abgor binoda joylashgan qishloq vrachlik punkti tasvirlangan video tarqaldi. Murojaatchi “Azlartepa” MFYda joylashgan Qurilish qishlog‘i aholisi aynan shu, abgor holatdagi binoda joylashgan tibbiyot maskanidan foydalanib kelishayotganini bildirgan.
Mazkur video ijtimoiy tarmoqlarda eʼlon qilinib, ko‘plab muhokamalarni keltirib chiqargach, viloyat Sog‘liqni saqlash boshqarmasi bunga munosabat bildirdi.
.jpg)
“ ‘Azlartepa’ MFY hududidagi Qurilish qishlog‘ida joylashgan sobiq Qurilish FAP (feldsherlik akusherlik punkti) binosi 1979—1980-yillarda turar joy sifatida qurilgan bo‘lib, 1989-yilda sobiq xo‘jalik maʼmuriyati tomonidan aholiga tibbiy xizmat ko‘rsatish va emlash ishlarini olib borish uchun Qoratepa ambulatoriyasiga berilgan. 2007-yildan buyon mahalla fuqarolar yig‘ini hududidagi 3250 nafar aholiga Qoratepa qishloq uchastka shifoxonasi tomonidan tibbiy xizmat ko‘rsatilmoqda. Shifoxonada 9 nafar shifokor, 63 nafar o‘rta tibbiyot xodimi faoliyat ko‘rsatmoqda.
Tibbiyot birlashmasi tomonidan emlash tadbirlari mazkur shifoxonaning ambulatoriya qismida tashkil etilishi bo‘yicha aniq topshiriqlar berilgan. Asosiy tadbirlar ambulatoriyada tashkil etilgan, ammo aholi talabiga ko‘ra baʼzida qishloq uchastka shifoxonasidan 3 kilometr masofada joylashgan eski FAP binosida ham emlash amalga oshirilgan. Ayni paytda eski FAP binosidan foydalanish qatʼiyan to‘xtatilib, emlash tadbirlari faqat qishloq uchastka shifoxonasi ambulatoriya qismida olib borilmoqda”, — deyiladi boshqarma axborotida.
“Daryo” jurnalisti bilan suhbatlashgan video muallifi Humoyun Xudoyorov tibbiyot punktini yopib qo‘yish muammo yechimi emasligini aytmoqda.
“Kecha Qamashi tumanidan ‘kattalar’ kelib, punktimizni yopildi deb muhrlab ketishibdi. Endi qishloqda barcha sen tufayli yopilib ketdi, deb bunda meni ayblashmoqda. Men shunchaki yangi medpunkt qurilishini xohlagan edim. Agar yangi medpunkt qurilmay, shunchaki yopib yuborishsa yoki yangi punkt qurilguncha bu ishlamay tursa, qishloq aholisiga kattagina noqulaylik tug‘iladi. Umid qilamanki, tibbiyot maskani yangi quriladi, toki yangisi qurilguncha eskisi shu holatda ishlab turadi. Yoki biror nima qilib beriladi. Lekin shunchaki yopib yuborish aholiga katta noqulaylik tug‘diradi. Ishlab turgan medpunktni yopib yuborish yechim emas-da”, — deydi u.
Qo‘shimcha qilinishicha, Qurilish qishlog‘i hududida mahalla tibbiyot punkti binosini qurish bo‘yicha tuman hokimligiga tegishli takliflar kiritilgan.
Izoh (0)