AQSH prezidenti Jo Baydenning navbatdagi saylov kampaniyasini qo‘llab-quvvatlash uchun Oq uy turli ijtimoiy platformalardagi mashhur blogerlarni jalb qilishni rejalashtirmoqda — ularga Amerika prezidenti qarorgohidan alohida brifing xonasi ochilishi mumkin. Bu haqda Axios nashri xabar bermoqda.
Baydenning raqamli jamoasidan to‘rt nafar xodim allaqachon ushbu loyiha ustida ishlamoqda, deya aniqlik kiritadi nashr. Shu bilan birga, ular rasmiy ravishda Demokratik partiya kampaniyasida emas, balki Oq uyda ishlaydi. Demokratlar oldiga qo‘yilgan asosiy vazifa — Demokratik partiyaning saylovdagi muvaffaqiyati uchun muhim bo‘lishi kutilayotgan yosh saylovchilarni jalb qilish va sobiq prezident Donald Tramp 2024-yilda Respublikachilar partiyasidan nomzodini qo‘yadigan bo‘lsa, uning ijtimoiy tarmoqlardagi millionlab izdoshlariga qarshi turishdir.
Baydenning raqamli strategiya jamoasi ijtimoiy tarmoqlarda na Oq uy, na Demokratik partiyaga ergashadigan yoki asosiy ommaviy axborot vositalaridan umuman “uzilgan” amerikaliklarni nishonga olish uchun butun mamlakat bo‘ylab mashhur odamlar bilan aloqa o‘rnatmoqchi.
“Biz yoshlar, shuningdek, ma’lumot olish uchun turli platformalardan foydalanadigan onalar, iqlim faollari va asosan raqamli platformalardan axborot oladigan boshqa odamlar bilan bog‘lanishga harakat qilmoqdamiz”, — dedi Oq uy apparati rahbari o‘rinbosari Jen O’Malli Dillon.
Bayden ikkinchi muddatga nomzodini qo‘yish qarorini hali rasman e’lon qilgani yo‘q. 2023-yil fevralida u 2024-yilgi prezidentlik saylovlarida ishtirok etish niyatini tasdiqlagandi, biroq hali yakuniy qarorga kelmagan.
Jurnalistlar bilan suhbatda Bayden yoshi va sog‘lig‘i unga qayta saylanishga to‘sqinlik qilmasligi va prezidentlik vazifalarini bajarishga xalaqit bermasligini aytgandi. 2024-yilgi AQSH prezidentlik saylovi vaqtida prezident Bayden 82 yoshga to‘ladi.
The Wall Street Journal nashrining yozishicha, Baydenning maslahatchilari allaqachon uning saylovoldi kampaniyasiga tayyorgarlikni muhokama qila boshlagan. Jamoa hozir ko‘rib chiqayotgan mavzular — kampaniya shtabining tuzilishi, uning asosiy xodimlari, shuningdek, bo‘lajak shtabning joylashuvi masalalaridan iborat.
Izoh (0)