Xitoy Kommunistik partiyasining Markaziy tartib-intizom komissiyasi China Great Wall Asset Management moliya kompaniyasi vitse-prezidenti, kompaniyaning partiyaga a’zo vakili Xu Syaoganga qarshi korrupsiya va poraxo‘rlik aybi bilan rasmiy tergov boshladi.
Kompaniya muammoli qarzlarni boshqarish bo‘yicha mamlakatdagi eng yirik operatorlardan biri hisoblanadi va davlat tomonidan nazorat qilinadi. Muammoli qarzlarni boshqarish bo‘yicha yana ikkita yetakchi operator — China Huarong Asset Management va China Cinda Asset Management kompaniyalari ham hukumat tomonidan nazorat qilinadi.
Kompaniyalar 1997-yilgi Osiyo moliyaviy inqirozidan so‘ng qarzdorlikni bartaraf etish uchun tuzilgan. Bloomberg va The Standard ma’lumotlariga ko‘ra, ushbu kompaniyalar boshqaruvidagi qarzlarning umumiy miqdori qariyb 700 milliard dollarni tashkil etadi.
Kommunistik partiya Markaziy qo‘mitasi tartib-intizom komissiyasining bayonotida aytilishicha, partiya a’zosi bo‘lgan 57 yoshli Xu Syaogan “partiya intizomi va qonunlarini jiddiy buzganlikda” gumon qilinmoqda. Syaogan sodir etgan harakatlar to‘g‘risida batafsil ma’lumot oshkor qilinmagan.
Ushbu tergov XXR moliya sektoridagi 2018-yildan beri eng yirik tergovlardan biri hisoblanadi. O‘shanda China Huarong Asset Management moliya kompaniyasining sobiq rahbari Lay Syaominga qarshi shunday ish olib borilgan. Layni tekshirish 2018-yil aprel oyida boshlangan, shu bilan birga u kompaniya raisligidan ozod qilinib, Xitoy Kommunistik partiyasidan chiqarilgan, 2018-yil oktabr oyida esa sudga tortilgan.
Tekshiruv davomida Lay Syaomin pora berish va olish, shuningdek, davlat mulkini o‘zlashtirish bilan bir necha bor partiya intizomi va mamlakat qonunlarini jiddiy ravishda buzgani aniqlangan.
Mavzuga doir:
Izoh (0)