Xitoyning Tyanszin shahrida 29-yanvar kuni partiyaning sobiq kotibi va China Huarong Asset Management Co. Ltd aksionerlik kengashining sobiq raisi Lay Syaominga qarshi o‘lim jazosi ijro etildi, deya xabar bermoqda Sinxua agentligiga tayanib “Korrespondent.net”.
Ta’kidlanishicha, Lay Syaomin yanvar oyi boshida korrupsiya, poraxo‘rlik va qo‘shxotinlikda ayblanib, o‘limga mahkum etilgan.
“Oliy xalq sudining ma’lumotlariga ko‘ra, 29-yanvar kuni ertalab Tyanszin shahrining ikkinchi darajali xalq sudi Lay Syaominga nisbatan o‘lim jazosini ijro etdi”, – deyiladi xabarda.
Ma’lum qilinishicha, 2018-yil kuzida Lay Syaomin intizom va qonunlarini jiddiy buzgani uchun partiyadan chiqarilgan. Intizomni tekshirish bo‘yicha Markaziy komissiya tomonidan o‘tkazilgan tergov natijalariga ko‘ra, Lay Syaomin siyosiy intizomni jiddiy ravishda buzgan.
Prokuratura ma’lumotlariga ko‘ra, u turli siyosiy avantyuralarda qatnashgan, shaxslarning amal zinapoyasida o‘sishiga yordam bergan va tekshiruvlarga to‘sqinlik qilgan.
Avvalroq Eron hukumati yarim yil ichida ikkinchi sportchini qatl etgani, Shimoliy Koreyada karantin qoidalarini buzgan erkak omma oldida otib o‘ldirilgani hamda Eronda muxolif jurnalist Ruhollah Zam qatl etilgani haqida xabar berilgandi.
Izoh (0)