Chexiya o‘zining strategik hujjatlarida birinchi marta Rossiya va Xitoyni milliy xavfsizlikka tahdid deb e’lon qiladi. Shu paytgacha hujjatlarda bunday mamlakatlar nomi ochiq ko‘rsatilmagan.
Ayni paytda Chexiya Mudofaa va Ichki ishlar vazirliklari xodimlari hujjat ustida ishlamoqda.
Chexiya Mudofaa vazirligi vakilining so‘zlariga ko‘ra, yangilangan strategiyalarda terrorizmdan tashqari eng katta tahdid manbalari bo‘lgan davlatlar aniq qilib ko‘rsatiladi, bular Rossiya va Xitoydir. U, shuningdek, mudofaa uchun muhim bo‘lgan boshqa hujjatlar, masalan, “Uzoq muddatli mudofaa istiqbollari” va “Qurolli kuchlarni tashkil etish konsepsiyasi” yangilanishini ma’lum qildi.
Mudofaa vazirligi vakili ushbu hujjatlar eskirgani va o‘z ahamiyatini yo‘qotgan noaniq iboralar bilan to‘la ekanini tan oldi.
Chexiyada 2015-yilda “Xavfsizlik strategiyasi”, 2017-yilda “Mudofaa strategiyasi” qabul qilingandi, unda xavfsizlikka tahdid solishi mumkin bo‘lgan muayyan davlatlar nomi ko‘rsatilmagan, faqat Sharqiy Yevropada o‘z ambitsiyalarini kuch bilan amalga oshirishga intilayotgan “ayrim kuchlar” qayd etilgan. Shu bilan birga ikkala strategiya ham Qrimning anneksiya qilinishi bilan yakunlangan Rossiyaning Ukrainaga birinchi hujumidan keyin qabul qilingan.
Yangi hujjatlarda ochiqchasiga Rossiya va Xitoy Chexiya va NATO xavfsizligiga tahdid soladigan asosiy tahdidlar sifatida ko‘rsatiladi.
Oktabr oyida Pentagon tomonidan tayyorlangan AQSHning yangi mudofaa strategiyasi Rossiyani “o‘tkir tahdid” deb atagan edi. Hujjatda, shuningdek, Xitoy “Qo‘shma Shtatlarga barcha jabhalarda, harbiy, iqtisodiy, texnologik va diplomatik jihatdan tizimli ravishda qarshilik ko‘rsatish niyati va qobiliyati ortib borayotgan yagona raqobatchi” ekanligi ma’lum qilingan.
Izoh (0)