Namanganlik 15 yashar Nurzida Isayeva ijrosidagi “Tuttur Dur” qo‘shig‘iga ishlangan video bir oy davomida TikTok platformasida 63 million marotaba ko‘rildi. Bu dunyo miqyosida ham mazkur servisdagi eng yuqori ko‘rsatkichlardan biri. “Daryo” muxbiri Azizbek Abduvaliyev ushbu o‘ziga xos rekord egasi bilan uchrashdi.
“Bu qo‘shiq ozarbayjonlik Naz Dej tomonida aytilgan. YouTube orqali tinglab, yoqtirib qoldim. Uni o‘zimizga moslab, kaver qilib, Namanganda, ‘Afsonalar vodiysi” bog‘ida Xalqaro xotin-qizlar kuniga bag‘ishlangan konsertda ilk bor ijro etdim.
Shu chiqishim videoga olingan va TikTok‘ka joylangandi. Keyin prodyuserim Oqilxon Tillaxonovdan mazkur video dunyo bo‘yicha top-10 talikka kirganligini eshitdim.
Hatto shu qo‘shiqning asl ijrochisi ham keyinchalik biz bilan aloqaga chiqdi”, — deydi Nurzida.
Aytish kerakki, bu Nurzida ijrosidagi qo‘shiqlarning ilk bor bunday yuqori ko‘rsatkichlarni qayd etishi emas. Oldiroq fors va turk xitlari qorishmasidan iborat “Nazan /Haydi Söyle” kaveri TikTok‘da 23 million marta ko‘rilgandi.
.jpg)
“Faqat xorij qo‘shiqlariga ishlangan kaverlargina ijtimoiy tarmoqlarda tarqalayotgan ekan degan xayolga bormaslik kerak.
Shoir Farhod Mo‘minov sheʼriga bastalangan ‘Yomg‘ir‘ nomli mualliflik qo‘shig‘imiz ham tobora ommalashib bormoqda. To‘y yoki tadbirlarda shu qo‘shig‘imni ko‘p so‘rashyapti, ko‘rishlar soni ham chakki emas — 3,3 milliondan oshdi”, — deydi Nurzida.
Xonandaning prodyuseri Oqilxon Tillaxonovning aytishicha, Nurzida TikTok o‘zbek segmentida 1,3 million obunachi to‘plab, eng ko‘p muxlisga ega yulduzlar qatoridan joy olgan.
Qolgan ijtimoiy tarmoqlardagi ko‘rsatkichlar ham chakki emas: Nurzida YouTube‘da 392 ming, Instagram‘da esa 170 ming obunachiga ega.
“Nurzidaning chet elda ham muxlislari ko‘p. Xususan, Ozarbayjon, Qozog‘iston, Tojikiston, Hindiston, Pokiston, Bangladesh, Iroq, Saudiya Arabistoni va boshqa davlatlarda.
Turkiyaning o‘zida “Tuttur Dur” qo‘shig‘iga ishlangan videoni 18 million kishi ko‘ribdi. Shu sabab bo‘lsa kerak, Turkiyadan gastrol safarlariga kelish bo‘yicha taklif oldik.
Xorijlik xonandalar Nurzida bilan duet aytish bo‘yicha murojaatlar ham qilishmoqda.
Jumladan, yaqinda tojikistonlik qo‘shiqchi Dilshod Tohiriydan shunday taklif oldik va buni amalga oshirdik ham”, — deydi xonandaning prodyuseri Oqilxon Tillaxonov.
Izoh (0)