Toshkentda erkak Central Park’dan uchib chiqqan oqqushni tutib, uyiga olib borib, oila davrasida yegani va keyinroq jarimaga tortilgani haqida xabar berilgan edi. “Mehr va Oqibat” Hayvonlarni muhofaza qilish jamiyati nodavlat-notijorat tashkiloti ushbu oila bilan bog‘da suhbatlashdi.
Ta’kidlanishicha, ta’lim dasturini amalga oshirish “Mehr va Oqibat” tashkilotining asosiy yo‘nalishlaridan biridir. Jamiyat a’zolari va ko‘ngillilari tomonidan ta’lim muassasalari va mahallalarda suhbatlar o‘tkazilmoqda. Shuningdek, huquqbuzarliklar profilaktikasi inspektorlari bilan birgalikda hayvonlarga nisbatan shafqatsiz munosabatda bo‘lish holatlari yuzasidan profilaktik suhbatlar olib borilmoqda.
Xususan, Markaziy bog‘da jamiyat ko‘ngillilari bog‘ga qarashli oqqushni so‘yib yegan oila vakillari bilan suhbatlashdi. Suhbatdan keyin bolalar bilan birgalikda parkdagi qushlar boqildi.
Suhbat davomida erkak o‘g‘illari uy yumushlariga yordam berishini, uy hayvonlarini boqishini, shaxmat va matematikaga qiziqishini aytdi. Shuningdek, u yigitlar ulg‘aygach, ko‘ngillilar safiga qo‘shilishi, hayvonlarni himoya qilishlariga umid bildirdi.
Ma’lumot uchun, istirohat bog‘idagi oqqush to‘siq ustidan uchib o‘tib, tashqaridagi yo‘lakka tushgan. U yerda fuqaro N. uni ushlab, uyiga olib ketgan. Qidiruv natijasida erkak topilgan. Aniqlanishicha, uning 13 yoshli o‘g‘illari oqqushning boshini kesib tashlagan. Keyinroq ular qushni yeb qo‘ygan. 6-avgust kuni “Mehr va Oqibat” vakillari, bog‘ xodimlari va Mirzo Ulug‘bek tumani profilaktika inspektori erkak va uning 13 yoshli o‘g‘illari bilan uchrashgan.
Otaning so‘zlariga ko‘ra, ular qushni oq g‘oz deb o‘ylashgan, uni ovqatlantirmoqchi bo‘lishgan, lekin u ovqatdan bosh tortgan.
Mavzuga doir:
Izoh (0)