Тошкент марказидаги “Алоқабанк” бош офиси ва Рақамли технологиялар вазирлигига тегишли офис бинолари аукционда умумий 387 млрд сўмга сотилди. Маълумотлар “E-auksion” порталида эълон қилинган.
Иккала бинолар ҳам Black Gold Industry News томонидан 4 апрель куни ўтказилган савдоларда сотиб олинган.
“Алоқабанк” бош офиси 302 млрд сўмлик бошланғич нарх билан кимошди савдосига қўйилган эди. Black Gold Industry News компанияси савдоларда 317,1 млрд сўм таклиф берган ва аукцион ғолиби бўлган.
Рақамли технологиялар вазирлигига тегишли бино ижараси эса 66,5 млрд сўмлик бошланғич нарх билан аукционга чиқарилган эди. Black Gold Industry News бу сафар 69,9 млрд сўм нарх билан бино ижарасини сотиб олган.
Black Gold Industry News 2022 йилнинг 31 январида ташкил қилинган компания бўлиб, расман тоғ-кон саноатида фаолият юритади.
Компаниянинг устав фонди 8 млн сўм ва Самарқанд шаҳрида рўйхатдан ўтган. Ягона таъсисчиси сифатида Зиёдулла Жалолов кўрсатилган.
Ягона корпоратив ахборот порталида маълум қилинишича, “Алоқабанк” 2023 йил 3 апрель куни Black Gold Industry News’га кўчмас мулк ва асосий воситалар сотиб олиш учун 180 ойга, йиллик 14 фоизлик 390 млрд сўм миқдорида кредит ажратган.
Изоҳ (0)