Qozog‘istonda aholi ishda spirtli ichimlik ichgan hokimni himoya qildi

Qozog‘istonning Pavlodar viloyatidagi qishloqlardan birining hokimi Bauirjon Bo‘ztayev ish joyida spirtli ichimliklar iste’mol qilgani uchun o‘z lavozimini yo‘qotish xavfi bor. Bu haqda Pavlodar axborot saytiga tayanib, “Daryo”ning Qozog‘istondagi muxbiri xabar berdi.

Axloqiy kengash a’zolari qonunni qo‘pol buzgani uchun hokimni ishdan bo‘shatmoqchi. Bauirjon Bo‘ztayev shu paytgacha rahbarlik va davlat xizmatida ishlagan vaqtida intizomiy jazoga tortilmagan. Biroq bu gal Qozog‘iston Davlat xizmati ishlari agentligi raisining ishonch telefoniga qishloqda yashovchi fuqaro qo‘ng‘iroq qilib, mansabdor shaxs mast holatda navbatchilik qilayotganini aytgan. Axloq komissari buni tekshirishga borgan. Hokim tibbiy ko‘rikdan o‘tkazilganda hammasi haqiqat bo‘lib chiqqan. Shu bilan birga, hokim o‘zini oqlashga urinmagan.

“Men bu faktni tasdiqlayman. 15-mart kuni qishloqda daryo toshdi, tushdan kechgacha suvni boshqa tomonga yo‘naltirishdi. Men qattiq shamolladim va spirtli ichimlik ichdim. Qilgan ishimdan chuqur afsusdaman. Sizga va qishloq aholisiga bu yerda bo‘lishga loyiqligimni yana bir bor isbotlash uchun imkoniyat berishingizni so‘rayman”, — dedi amaldor. 

Ammo axloqiy kengash vakillari davlat xizmatchisining ish joyida mast holatda bo‘lishi qonunni qo‘pol ravishda buzish, degan xulosaga keldi. Endilikda komissiya Bauirjon Bo‘ztayevni ishdan bo‘shatish taklifi bilan Ekibastuz shahri hokimiga murojaat qilmoqchi. Qishloq aholisi hokimga nisbatan yengilroq choralar ko‘rish talabi bilan murojaat qilgan.

Svetlana Shesternyova, Olmaota