Ostona shahrining Sariyarkin tumani 2-sonli sudi oligarx Qayrat Bo‘ronboyevni o‘ta yirik miqdordagi mablag‘ni o‘zlashtirishda aybdor deb topib, 8 yilga ozodlikdan mahrum qildi. Bu haqda “KazTag” xabar berdi.
Sud qamoq jazosidan tashqari qozog‘istonlik oligarxning mol-mulkini musodara qilish haqida qaror chiqardi. Mazkur ish bo‘yicha yana ikki ayblanuvchi — “AsiaGazChunja” bosh direktori Roman Naxanov va “QazaqGaz” boshqaruvi raisining sobiq o‘rinbosari Tayir Januzak ham 8 yillik koloniyada jazo o‘tashga hukm qilindi.
Ularning barchasi “QazaqGaz” milliy kompaniyasiga gazni qayta sotish vaqtida 14,5 milliard tenge (taxminan 32 million dollar)ni o‘zlashtirishda aybdor deb topildi. Barcha mahkumlar davlat xizmatidagi lavozimlarni egallash huquqidan umrbod mahrum etildi. Sud Qozog‘iston prezidenti nomiga aybdorlarni barcha davlat mukofotlaridan mahrum qilish yuzasidan taqdimnoma kiritishga qaror qildi. Mahkumlar jazoni o‘rtacha tartibli koloniyada o‘taydi.
Qayrat Bo‘ronboyev 2022-yilning 15-mart kuni Olmaota shahrida Moliyaviy monitoring agentligi xodimlari tomonidan qo‘lga olingan.
Bo‘ronboyev Qozog‘istonning birinchi prezidenti Nursulton Nazarboyevning sobiq qudasi. Oligarxning qizi sobiq davlat rahbarining nabirasiga (Darig‘a Nazarboyevning o‘g‘li) turmushga chiqqan. Bo‘ronboyev Qozog‘istonning eng boy odamlaridan biri hisoblanadi.
U Qozog‘iston, Belarus va Rossiyaning bir qancha viloyatlarida McDonald’s franchayzi sanaladi. Rossiyalik milliarder Viktor Xaritonin va boshqa hamkorlar bilan birgalikda Rossiyada ishlab chiqilgan “Sputnik-V” kovid vaksinasini idishlarga soluvchi Qaraganda farmatsevtika kompleksi MCHJga egalik qiladi.
Izoh (0)