Қозоғистонда 10 апрелдан фуқаролардан ноқонуний сақланаётган ўқотар қуроллар, ўқ-дорилар ва портловчи моддаларни сотиб олиш бошланади. Бу ҳақда Есил тумани ИИБда бўлиб ўтган брифингга таяниб, “Дарё”нинг Қозоғистондаги мухбири хабар берди.
Пойтахт ИИБ маъмурий полиция бошқармасининг махсус топшириқлар бўйича катта инспектори Азамат Амен бу ҳақда маълумот берган. У ҳукумат қуролларни ихтиёрий топширганлик учун ўз ғазнасидан 34500 тенгедан (77 доллар) 345 минг тенгегача (771 доллар) тўлашга тайёрлигини билдирди. Қуролни топширган шахснинг карта ҳисобига пул туширилади.
Мукофот пули миқдори нимага боғлиқ бўлади?
Отишга ва сотишга яроқли қуроллар учун максимал миқдорда пул берилади. Фойдаланишга яроқли, лекин сотилмаган ўқотар қуроллар дастлабки қийматининг 70 фоиз миқдорида баҳоланади.
“Суд-тиббиёт экспертларининг хулосасига кўра, қурол, ўқ-дорилар ва портловчи моддалар сифатида тан олинмаган буюмларга пул тўланмайди. Ушбу рўйхатга Ички ишлар вазирлигида рўйхатдан ўтган ёки ‘жиноят’ тоифасида рўйхатга олинган, яъни илгари йўқолган ёки ўғирланган қуроллар ҳам киради. Газли ва травматик қуроллар учун қўлда ясалган ўқ-дорилар ҳам сотиб олинмайди”, — деди Азамат Амен.
Остоналиклар Қозоғистон пойтахтининг барча полиция бўлимларида қурол-яроғни пулга алмаштириши мумкин бўлади. Портловчи ўқ-дориларни топиб олганлардан уларни ўзлари билан олиб кетмаслик, зудлик билан энг яқин полиция бўлимига қўнғироқ қилиш сўралган.
Қуролни топширган шахслар жиноий ва маъмурий жавобгарликдан ихтиёрий равишда озод қилинади. Ўқотар қурол ва бошқа ўқ-дориларни сотиб олиш учун ҳар бир ҳудуднинг ўз миқдори мавжуд. Остона учун бу йил 2 миллион тенгедан (4470 доллар) ошади. Ушбу маблағларга 25 дан 35 тагача қурол сотиб олиниши кутилмоқда.
Светлана Шестернёва, Олмаота
Изоҳ (0)