Qamchiq dovonida yonib ketgan yuk mashinasi haydovchisi halok bo‘lgani ma’lum qilindi

Qamchiq dovonida yuk mashinasi va uchta yengil avtomobil ishtirokida YTH sodir bo‘lgandi. FVV hodisa oqibatida yuk mashina haydovchisi vafot etganini ma’lum qildi.

Voqea 6-aprel kuni soat 11:10 da Toshkent—O‘sh xalqaro avtomobil yo‘lining Qamchiq dovoniga o‘tuvchi yo‘lda yuz bergandi. Uchta yengil avtomobil bilan to‘qnashishi oqibatida lak-bo‘yoq mahsulotlarini olib ketayotgan yuk mashinasi ag‘darilib, yonib ketgan. Favqulodda vaziyatlar vazirligining yong‘in-qutqaruv guruhlari zudlik bilan voqea joyiga yetib borib, 25 daqiqa ichida yong‘inni o‘chirgan.

Hodisa natijasida 6 kishi jabrlangan, ular eng yaqin tibbiyot muassasasiga yotqizilgan. Yong‘in to‘liq o‘chirilgandan so‘ng yuk mashinasining haydovchisi vafot etgani aniqlangan.

Yong‘inni o‘chirish vaqtida dovonda transport harakati vaqtincha yopilgan, soat 13:15 da transport harakati tiklangan.