Senatning 39-yalpi majlisida “Jinoyat kodeksiga korrupsiyaga oid jinoyatlar uchun javobgarlik muqarrarligini ta’minlashga qaratilgan o‘zgartish va qo‘shimchalar kiritish to‘g‘risida”gi qonun ko‘rib chiqildi. Bu haqda parlament yuqori palatasi matbuot xizmati xabar berdi.
Jinoyat kodeksi “korrupsiyaga oid jinoyatlar” degan yangi atama bilan to‘ldirilib, unga ko‘ra kodeksning tegishli moddalari, qismi va bandlarida nazarda tutilgan qilmishlar korrupsiyaga oid jinoyatlar deb topilishi belgilanmoqda hamda ushbu jinoyatlar uchun jazoni kuchaytirish nazarda tutilmoqda.
Shuningdek, ushbu qonun bilan Jinoyat kodeksining tegishli moddalariga kiritilayotgan o‘zgartirishlar orqali o‘zlashtirish yoki rastrata yo‘li bilan talon-toroj qilish, firibgarlik, soliqlar yoki boshqa majburiy to‘lovlarni to‘lashdan bo‘yin tovlash uchun hukm qilingan, biroq jinoyat oqibatida yetkazilgan zararni to‘liq qoplamagan shaxslarga hamda pora olish, pora berish, pora olish-berishda vositachilik qilish jinoyatlarni sodir etgan shaxslarga nisbatan jazodan muddatidan ilgari shartli ravishda ozod qilish va jazoni yengilrog‘i bilan almashtirish kabi normalar qo‘llanilmaydi.
Korrupsiyaga qarshi kurashish agentligi direktori Akmal Burhonovning yozishicha, Senat mazkur qonunni ma’qullagan. Unga ko‘ra,
- hokimiyat yoki mansab vakolatini suiisteʼmol qilish (205-modda) hamda hokimiyat harakatsizligi (208-modda) jinoyatlari g‘arazli niyatlarda sodir etilgan bo‘lsa, besh yilgacha ozodlikdan mahrum qilish;
- pora olganlik (210-modda), pora berganlik (211-modda) va pora olish-berishda vositachilik qilganlik (212-modda) uchun 20 yilgacha ozodlikdan mahrum qilish jazosi qo‘llanilishi belgilanmoqda.
Jinoyat kodeksining sakkizinchi bo‘limi Korrupsiyaga oid jinoyatlar atamasi bilan to‘ldirilmoqda va 16 ta moddada nazarda tutilgan jinoyatlar (167-modda uchinchi qismi “d” bandi, 168-modda to‘rtinchi qismi “g” bandi, 192-9, 192-10-moddalari, 192-11-modda ikkinchi qismi “v” bandi, 205-modda ikkinchi qismi “v” bandi, 206-modda ikkinchi qismi “v” bandi, 208-modda ikkinchi qismi, 209-modda ikkinchi qismi “v” bandi, 210, 211, 212, 213, 214-moddalari va 301-modda ikkinchi qismi “b” bandi) shuningdek, 243-moddada nazarda tutilgan, korrupsiyaga oid jinoyatlarni sodir etish natijasida olingan daromadlarga nisbatan sodir etilgan jinoyatlar korrupsiyaviy jinoyatlar sifatida eʼtirof etilmoqda.
Qonun prezident tomonidan imzolangandan so‘ng kuchga kiradi.
Ta’kidlash kerakki, O‘zbekistonda korrupsiyaga oid jinoyatlar uchun javobgarlik choralari keskin kuchaytirish nazarda tutilgan mazkur qonun loyihasi 2021-yil dekabrda Oliy Majlis deputatlari tomonidan birinchi o‘qishda qabul qilingandi.
Izoh (0)