Ispaniyaning “Maksam” kompaniyasi O‘zbekistondagi kimyo sanoati qo‘shma korxonasi — “Maksam—Chirchiq” bo‘yicha uzoq davom etgan nizo yuzasidan xalqaro arbitraj ishini qo‘zg‘atgan edi.
“O‘zkimyosanoat” va Davlat aktivlarini boshqarish agentligi tomonlar o‘rtasida o‘tkazilgan muzokaralarga qaramay, “Maxamcorp”ning arbitraj da’volari kiritganligi to‘g‘risidagi bildirishnomalarni olganidan hayratda va kompaniyaga nisbatan hafsalasi pir bo‘lganligini ma’lum qildi.
“Maxamcorp International” (“Maksam”) ispan kompaniyasi, 2007-yilda “O‘zkimyosanoat” bilan birgalikda 2 ta qo‘shma korxona — “Maksam-Chirchiq” AJ va “Ammofos-Maksam” AJlarni tashkil etgan.
“O‘zkimyosanoat” va Davaktiv qayd etishicha, qabul qilingan majburiyatlarga qaramay, “Maksam” kompaniyasi investitsiyalarni jalb qilish bo‘yicha o‘z majburiyatlarini bajarmagan va hozirda ularni bajarishdan bosh tortmoqda.
O‘zbekiston tomoni “Maksam” kompaniyasining shartnoma munosabatlarini buzganlik haqidagi asossiz ayblovlarini qat‘iyan rad etgan.
“Ikki qo‘shma korxona qariyb o‘n besh yildan buyon muvaffaqiyatli faoliyat yuritib kelmoqda. “Maksam” tomonidan qo‘zg‘atilgan daʼvolar shartnoma majburiyatlarini buzganliklarini yashirish va noto‘g‘ri boshqaruv, samarasizlik, sarmoya kiritmaslik va O‘zbekiston qonunchiligiga rioya qilmaslik uchun javobgarlikdan qochishdan boshqa narsa emas”, — deyiladi “O‘zkimyosanoat” xabarida.
Ta’kidlanishicha, “Maksam” kompaniyasi tomonidan investitsiya majburiyatlarini bajarmaslik qo‘shma korxonalar faoliyatiga hamda modernizatsiya va kengaytirish qobiliyatiga sezilarli darajada to‘sqinlik qiladi.
“O‘zkimyosanoat” va Davaktiv tomonlarning savollari va pozitsiyalari sir saqlanishi lozim bo‘lgan bir paytda, “Maksam” kompaniyasi o‘z da‘volarini oshkor qilganidan hayratda ekanligini ma’lum qilgan.
O‘zbekiston tomoni har doim birgalikdagi faoliyat to‘g‘risidagi tegishli kelishuvlarga va O‘zbekiston Respublikasining amaldagi qonunchiligiga muvofiq ish yuritgan hamda hech qanday shartnoma yoki boshqa majburiyatlarni buzmaganini ta’kidlagan.
“O‘zkimyosanoat” va Davaktiv ayni paytda “Maksam” kompaniyasi bilan kelishmovchilikni do‘stona va vijdonan hal qilish tarafdori ekanini bildirgan.
O‘zbekiston tomoni ham “Maksam” kompaniyasiga qarshi da‘volari borligi ma’lum qilgan.
Qayd etilishicha, “Maksam” kompaniyasi o‘zining butun faoliyati davomida qo‘shma korxonalar faoliyatini yaxshilashga qaratilgan ishlarni amalga oshirishni emas, faqatgina dividentlar olishni ko‘zlagan.
““Maksam” kompaniyasining majburiyatlari qo‘shma korxonalarni modernizatsiya qilish va zamonaviy texnologiyalar bilan ta‘minlash, ishlab chiqarish uskunalarini takomillashtirish va texnik yordam ko‘rsatishni qamrab olgan. Biroq, "Maksam" kompaniyasi o‘z majburiyatlarini bajarmadi. Buni 2022-yil oktabr oyida “Maksam-Chirchiq” aksiyadorlik jamiyati zavodida yuz bergan eskirgan uskunaning avariyasi ham tasdiqlaydi,” — deyiladi xabarda.
Shu bilan birga, so‘nggi yillarda qo‘shma korxonalar faoliyatidan olinadigan foyda sezilarli darajada oshgani, mavjud quvvatlar modernizatsiya qilinib, faoliyatda yaxshilanishlar kuzatilayotganini aytilgan.
Ta’kidlanishicha, bunga investor va uning vakillari ishtirokisiz faqat O‘zbekiston tomonining saʼy-harakatlari evaziga erishilgan.
“O‘zkimyosanoat” va Davaktiv barcha mavjud bahsli masalalar qonuniy hal etilishiga umid bildirgan.
Shu munosabat bilan, O‘zbekiston tomoni “Maksam” kompaniyasining da‘volari bo‘yicha huquqiy pozitsiya tayyorlamoqda va ular belgilangan tartibda taqdim etiladi.
Izoh (0)