Испаниянинг “Максам” компанияси Ўзбекистондаги кимё саноати қўшма корхонаси — “Максам—Чирчиқ” бўйича узоқ давом этган низо юзасидан халқаро арбитраж ишини қўзғатган эди.
“Ўзкимёсаноат” ва Давлат активларини бошқариш агентлиги томонлар ўртасида ўтказилган музокараларга қарамай, “Maxамcорп”нинг арбитраж даъволари киритганлиги тўғрисидаги билдиришномаларни олганидан ҳайратда ва компанияга нисбатан ҳафсаласи пир бўлганлигини маълум қилди.
“Maxаmcоrp International” (“Максам”) испан компанияси, 2007 йилда “Ўзкимёсаноат” билан биргаликда 2 та қўшма корхона — “Максам-Чирчиқ” АЖ ва “Аммофос-Максам” АЖларни ташкил этган.
“Ўзкимёсаноат” ва Давактив қайд этишича, қабул қилинган мажбуриятларга қарамай, “Максам” компанияси инвестицияларни жалб қилиш бўйича ўз мажбуриятларини бажармаган ва ҳозирда уларни бажаришдан бош тортмоқда.
Ўзбекистон томони “Максам” компаниясининг шартнома муносабатларини бузганлик ҳақидаги асоссиз айбловларини қатъиян рад этган.
“Икки қўшма корхона қарийб ўн беш йилдан буён муваффақиятли фаолият юритиб келмоқда. “Максам” томонидан қўзғатилган даъволар шартнома мажбуриятларини бузганликларини яшириш ва нотўғри бошқарув, самарасизлик, сармоя киритмаслик ва Ўзбекистон қонунчилигига риоя қилмаслик учун жавобгарликдан қочишдан бошқа нарса эмас”, — дейилади “Ўзкимёсаноат” хабарида.
Таъкидланишича, “Максам” компанияси томонидан инвестиция мажбуриятларини бажармаслик қўшма корхоналар фаолиятига ҳамда модернизация ва кенгайтириш қобилиятига сезиларли даражада тўсқинлик қилади.
“Ўзкимёсаноат” ва Давактив томонларнинг саволлари ва позициялари сир сақланиши лозим бўлган бир пайтда, “Максам” компанияси ўз даъволарини ошкор қилганидан ҳайратда эканлигини маълум қилган.
Ўзбекистон томони ҳар доим биргаликдаги фаолият тўғрисидаги тегишли келишувларга ва Ўзбекистон Республикасининг амалдаги қонунчилигига мувофиқ иш юритган ҳамда ҳеч қандай шартнома ёки бошқа мажбуриятларни бузмаганини таъкидлаган.
“Ўзкимёсаноат” ва Давактив айни пайтда “Максам” компанияси билан келишмовчиликни дўстона ва виждонан ҳал қилиш тарафдори эканини билдирган.
Ўзбекистон томони ҳам “Максам” компаниясига қарши даъволари борлиги маълум қилган.
Қайд этилишича, “Максам” компанияси ўзининг бутун фаолияти давомида қўшма корхоналар фаолиятини яхшилашга қаратилган ишларни амалга оширишни эмас, фақатгина дивидентлар олишни кўзлаган.
““Максам” компаниясининг мажбуриятлари қўшма корхоналарни модернизация қилиш ва замонавий технологиялар билан таъминлаш, ишлаб чиқариш ускуналарини такомиллаштириш ва техник ёрдам кўрсатишни қамраб олган. Бироқ, "Максам" компанияси ўз мажбуриятларини бажармади. Буни 2022 йил октябрь ойида “Максам-Чирчиқ” акциядорлик жамияти заводида юз берган эскирган ускунанинг аварияси ҳам тасдиқлайди,” — дейилади хабарда.
Шу билан бирга, сўнгги йилларда қўшма корхоналар фаолиятидан олинадиган фойда сезиларли даражада ошгани, мавжуд қувватлар модернизация қилиниб, фаолиятда яхшиланишлар кузатилаётганини айтилган.
Таъкидланишича, бунга инвестор ва унинг вакиллари иштирокисиз фақат Ўзбекистон томонининг саъй-ҳаракатлари эвазига эришилган.
“Ўзкимёсаноат” ва Давактив барча мавжуд баҳсли масалалар қонуний ҳал этилишига умид билдирган.
Шу муносабат билан, Ўзбекистон томони “Максам” компаниясининг даъволари бўйича ҳуқуқий позиция тайёрламоқда ва улар белгиланган тартибда тақдим этилади.
Изоҳ (0)