Ўзбекистонда 2026 йилда марказлашган ичимлик суви билан таъминланганлик 90 фоизга, оқова сув хизмати билан қамраб олинганлик даражаси 35 фоизга етказилади.
Хабарга кўра, АОКАда ўтказилган брифингда “Ўзсувтаъминот”АЖ ахборот хизмати раҳбари Акмал Муродов аҳолини ичимлик суви билан таъминлаш йўналишида амалга оширилган асосий ишлар ҳақида маълумот берди. Сўнгги 6 йилда аҳолининг ичимлик суви таъминотини яхшилашга 10 триллион сўмга яқин маблағ йўналтирилди. Ушбу маблағлар ҳисобидан 1 176 та сув иншооти ва 20,8 минг км ичимлик суви тармоқлари тортилди. Натижада республика аҳолисининг марказлашган ичимлик суви билан таъминланганлик даражаси 2017 йилда 63,9 фоизни ташкил этган бўлса, бугунга келиб ушбу кўрсаткич 74,4 фоизга етказилди. Ушбу давр мобайнида 8,2 миллион нафар аҳоли илк бор марказлашган ичимлик суви билан таъминланди, 4,8 миллион нафар аҳолининг эса ичимлик суви таъминоти яхшиланди.
Ҳозирда “Катта тўртлик” туркумига кирувчи Ernst and Young Аdvisory компанияси билан биргаликда акциядорлик жамияти фаолиятини трансформация қилиш бўйича 10 та асосий йўналиш белгиланиб, бу борада ишлар олиб борилмоқда.
Янги Ўзбекистоннинг тараққиёт стратегиясига мувофиқ 2026 йилга келиб, республика аҳолисининг марказлашган ичимлик суви билан таъминланганлик даражасини 90 фоизга, оқова сув хизматлари билан қамраб олинганлик даражасини эса 35 фоизга етказиш режалаштирилган. Бу ишлар учун 40 триллион сўм инвестиция жалб қилиш кўзда тутилган.
Изоҳ (0)