Davlat xavfsizlik xizmati xodimlari tomonidan Toshkent shahrida o‘tkazilgan tezkor tadbirda qariyb 40 kilogramm giyohvandlik moddalari tranzitiga chek qo‘ydi, deb xabar beradi O‘zA.
Qayd etilishicha, tezkor tadbirda ikki nafar O‘zbekiston fuqarosi hamda bir nafardan Tojikiston va Qozog‘iston respublikalari fuqarolari ushlanib, ulardan 12,8 kilogramm opiy va 27 kilogramm 50 gramm gashish narkotik moddalari protsessual tartibda rasmiylashtirib olindi.
Tezkor tadbir davomida mazkur shaxslar DXX xodimlarining qonuniy talablariga bo‘ysunmasdan, voqea joyidan qochishga urinishgan.
Taʼkidlash lozimki, O‘zbekistonga kontrabanda yo‘li bilan olib kelingan ushbu giyohvandlik vositalari mamlakati hududi orqali boshqa davlatga olib chiqib ketilishi kerak bo‘lgan.
Hozirda holat yuzasidan mazkur fuqarolarga nisbatan DXX Tergov boshqarmasi tomonidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Avvalroq Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming dollar evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)