Давлат хавфсизлик хизмати ходимлари томонидан Тошкент шаҳрида ўтказилган тезкор тадбирда қарийб 40 килограмм гиёҳвандлик моддалари транзитига чек қўйди, деб хабар беради ЎзА.
Қайд этилишича, тезкор тадбирда икки нафар Ўзбекистон фуқароси ҳамда бир нафардан Тожикистон ва Қозоғистон республикалари фуқаролари ушланиб, улардан 12,8 килограмм опий ва 27 килограмм 50 грамм гашиш наркотик моддалари процессуал тартибда расмийлаштириб олинди.
Тезкор тадбир давомида мазкур шахслар ДХХ ходимларининг қонуний талабларига бўйсунмасдан, воқеа жойидан қочишга уринишган.
Таъкидлаш лозимки, Ўзбекистонга контрабанда йўли билан олиб келинган ушбу гиёҳвандлик воситалари мамлакати ҳудуди орқали бошқа давлатга олиб чиқиб кетилиши керак бўлган.
Ҳозирда ҳолат юзасидан мазкур фуқароларга нисбатан ДХХ Тергов бошқармаси томонидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг доллар эвазига гиёҳванд модда сотишга уринганлар қўлга тушгани тўғрисида хабар берилганди.
Изоҳ (0)