AQSH sobiq prezidenti Donald Tramp o‘ziga tegishli Trump Organization tashkilotining birinchi darajali moliyaviy hisobotlarini soxtalashtirishda 34 ta ayblov bo‘yicha 136 yillik qamoq jazosiga hukm qilinishi mumkin. Bu haqda Fox News telekanali ma’lum qildi. Shu bilan birga, Oq uy sobiq rahbari ayblovlarning bir qismi yoki barchasi bo‘yicha aybdor deb topilgan taqdirda ham, katta ehtimol bilan unga beriladigan haqiqiy muddat ancha past bo‘ladi, deya ta’kidladi jurnalistlar.
Ishga oid hujjatlarni qalbakilashtirish Nyu-York shahrida qonunbuzarlik hisoblanadi, ammo jinoyatchi buni “boshqa jinoyatni sodir etish yoki uni yashirishga urinish” uchun qilgan bo‘lsa, bu maksimal to‘rt yillik qamoq jazosini nazarda tutadi.
Nyu-York okrugi prokurori Alvin Breggning so‘zlariga ko‘ra, gap Trampning saylovda nomzodini noqonuniy yo‘llar bilan ilgari surishi haqida ketayotgan bo‘lishi ham mumkin. Bundan tashqari, soliq organlariga bir qancha yolg‘on bayonotlar berish rejalashtirilgan, shuningdek, federal saylov qonunchiligining boshqa tarzda buzilish holatlari ham bo‘lishi mumkin.
“130 ming dollarlik dastlabki maxfiy to‘lovni yashirish uchun Nyu-Yorkdagi biznes hujjatlariga jami 34 ta noto‘g‘ri yozuv kiritilgan”, — deya qo‘shimcha qildi Bregg.
Trampga qarshi ayblovlar
Nyu-Yorkdagi Manxetten sudi 4-aprel kuni Donald Trampga ayblov e’lon qildi. Sud majlisida Tramp aybini tan olishdan bosh tortdi.
Bu AQSH tarixida birinchi marta sobiq davlat rahbariga nisbatan jinoiy ish qo‘zg‘atilishi bo‘ldi. Tramp rasman hibsga olingan holda sudda ikki soatcha vaqt o‘tkazdi, shundan so‘ng u sud binosini tark etdi.
Tergovchilar versiyasiga ko‘ra, 2015-yil avgustidan 2017-yil dekabrigacha Tramp boshqa shaxslar bilan birgalikda 2016-yilgi prezidentlik saylovlariga ta’sir qilish, o‘zi haqidagi salbiy ma’lumotlar tarqalishiga yo‘l qo‘ymaslik uchun ularni “sotib olish” sxemasini tashkil qilgan. Shu bilan birga, Tramp “biznes hujjatlariga o‘nlab yolg‘on yozuvlar kiritish” orqali bu harakatlarini yashirishga uringan.
Sobiq aktrisa Stormi Denels ishi
Trampga qarshi ayblovlarning markaziy epizodlaridan biri bu sobiq aktrisa Stormi Deniels (asl ismi Stefani Kliffrods) ishi. Ayblov xulosasiga ko‘ra, prezidentlik saylovlaridan biroz oldin Deniels Donald Tramp bilan yaqin munosabatlarini oshkor qilmasligi uchun aktrisaga 130 ming dollar to‘langan.
Trampning o‘zi bu ayblovlarni 2024-yilgi saylovlarda ishtirok etish rejalari bilan bog‘liq “siyosiy ta’qib” deb atamoqda. Tramp navbatdagi sudga 4-dekabr kuni chaqirilishi kutilmoqda. Unga qadar yig‘ilishlar o‘tkazilib, unda sobiq prezident advokatidan tushgan arizalar ko‘rib chiqiladi.
Izoh (0)