АҚШ собиқ президенти Дональд Трамп ўзига тегишли Trump Организатион ташкилотининг биринчи даражали молиявий ҳисоботларини сохталаштиришда 34 та айблов бўйича 136 йиллик қамоқ жазосига ҳукм қилиниши мумкин. Бу ҳақда Fox News телеканали маълум қилди. Шу билан бирга, Оқ уй собиқ раҳбари айбловларнинг бир қисми ёки барчаси бўйича айбдор деб топилган тақдирда ҳам, катта эҳтимол билан унга бериладиган ҳақиқий муддат анча паст бўлади, дея таъкидлади журналистлар.
Ишга оид ҳужжатларни қалбакилаштириш Нью-Йорк шаҳрида қонунбузарлик ҳисобланади, аммо жиноятчи буни “бошқа жиноятни содир этиш ёки уни яширишга уриниш” учун қилган бўлса, бу максимал тўрт йиллик қамоқ жазосини назарда тутади.
Нью-Йорк округи прокурори Алвин Бреггнинг сўзларига кўра, гап Трампнинг сайловда номзодини ноқонуний йўллар билан илгари суриши ҳақида кетаётган бўлиши ҳам мумкин. Бундан ташқари, солиқ органларига бир қанча ёлғон баёнотлар бериш режалаштирилган, шунингдек, федерал сайлов қонунчилигининг бошқа тарзда бузилиш ҳолатлари ҳам бўлиши мумкин.
“130 минг долларлик дастлабки махфий тўловни яшириш учун Нью-Йоркдаги бизнес ҳужжатларига жами 34 та нотўғри ёзув киритилган”, — дея қўшимча қилди Брегг.
Трампга қарши айбловлар
Нью-Йоркдаги Манхеттен суди 4 апрель куни Дональд Трампга айблов эълон қилди. Суд мажлисида Трамп айбини тан олишдан бош тортди.
Бу АҚШ тарихида биринчи марта собиқ давлат раҳбарига нисбатан жиноий иш қўзғатилиши бўлди. Трамп расман ҳибсга олинган ҳолда судда икки соатча вақт ўтказди, шундан сўнг у суд биносини тарк этди.
Терговчилар версиясига кўра, 2015 йил августидан 2017 йил декабригача Трамп бошқа шахслар билан биргаликда 2016 йилги президентлик сайловларига таъсир қилиш, ўзи ҳақидаги салбий маълумотлар тарқалишига йўл қўймаслик учун уларни “сотиб олиш” схемасини ташкил қилган. Шу билан бирга, Трамп “бизнес ҳужжатларига ўнлаб ёлғон ёзувлар киритиш” орқали бу ҳаракатларини яширишга уринган.
Собиқ актриса Сторми Денелс иши
Трампга қарши айбловларнинг марказий эпизодларидан бири бу собиқ актриса Сторми Дэниэлс (асл исми Стефани Клиффродс) иши. Айблов хулосасига кўра, президентлик сайловларидан бироз олдин Дэниэлс Дональд Трамп билан яқин муносабатларини ошкор қилмаслиги учун актрисага 130 минг доллар тўланган.
Трампнинг ўзи бу айбловларни 2024 йилги сайловларда иштирок этиш режалари билан боғлиқ “сиёсий таъқиб” деб атамоқда. Трамп навбатдаги судга 4 декабрь куни чақирилиши кутилмоқда. Унга қадар йиғилишлар ўтказилиб, унда собиқ президент адвокатидан тушган аризалар кўриб чиқилади.
Изоҳ (0)