Indoneziyada 4 nafar O‘zbekiston fuqarosi terrorchilikda gumonlanib qo‘lga olindi

Indoneziya politsiyasining terrorga qarshi kurash bo‘limi Densus 88 to‘rt nafar O‘zbekiston fuqarosini ijtimoiy tarmoqlarda terror tashviqotini tarqatganlikda ayblab qo‘lga oldi. Indoneziya politsiyasi brigadasi matbuot kotibining aytishicha, o‘zbekistonliklar “Katiba Tavhid val Jihod” xalqaro terror tashkilotiga aloqadorlikda gumon qilinmoqda. 

Gumonlanuvchilar B.A. 32 yoshli, O.M.M 28, B.K.A 40 va M.R. 26 yoshli kishilar ekani ma’lum qilindi. Ular Indoneziyaga Istanbuldan kelishgan va mamlakatga Malayziya orqali kirishgan. O‘zbekistonliklarning ikki nafari 2023-yilning 6-fevralida Indoneziyaga jo‘nab ketgan, qolganlari esa uch haftadan so‘ng 27-fevral kuni Indoneziyaga yetib borgan.

Dastlabki tergov natijalariga ko‘ra, B.A, O.M.M va M.R Yaqin Sharq mintaqasida, xususan Suriyada faol bo‘lgan xalqaro terror tashkiloti a’zosi. Boshqa bir gumonlanuvchi B.K.A esa ularga moliyaviy yordam hamda soxta hujjatlarni taqdim etib kelgan.

Xabarga ko‘ra, B.A 2021-yilda tashkilot direktori bo‘lgan va O‘zbekistondan Turkiyaga jo‘nab ketgan. Shundan so‘ng u Suriyadagi jangarilar lageriga jo‘natilgan.

B.A Turkiyada bo‘lganida radikal tashviqotni tarqatgan. Xabar qilinishicha, u teraktlarni amalga oshirish niyatida bo‘lgan “Katiba Tavhid val Jihod” guruhi aʼzolarini qabul qilish va ularni tegishli joylarga yetkazish bilan shug‘ullangan.

“Hozirda O‘zbekiston Ichki ishlar vazirligi unga nisbatan radikal mafkura targ‘iboti bo‘yicha jinoiy ish qo‘zg‘atgan”, — dedi Indoneziya politsiyasi generali Ahmad Ramazon.

 “Katiba Tavhid val Jihod” tarafdori O.M.M Suriyadagi guruh rahbariyatining buyrug‘i bilan 2020-yilda Suriyaga ketgani xabar qilindi. Aytilishicha, u lagerda qo‘poruvchilik terrorizm bo‘yicha mashg‘ulotlarni tamomlagan va guruh faoliyatida faol ishtirok etgan.

M.R esa 2020-yilda “Katiba Tavhid val Jihod” direktori sifatida Suriyaga jo‘natilgan, 2022-yilda esa Iordaniya poytaxtida terrorizm bo‘yicha o‘quv mashg‘ulotlarini tamomlagan.

Densus 88 to‘rt nafar gumonlanuvchiga tegishli bo‘lgan mahalliy va xalqaro pasportlar, pul o‘tkazmasi ma’lumotlari, aviachiptaga buyurtma, bir nechta uyali telefonlar va tashviqot materiallarining “skrinshotlari” ko‘rinishidagi dalillarni oldi.

Densus 88 katta komissari Asvin Siregarning aytishicha, o‘zbekistonliklar hali hibsga olinmagan.

“Ayni paytda ular hibsga olingani yo‘q. Biz hozircha aloqador tomonlar bilan o‘z harakatlarimizni muvofiqlashtirmoqdamiz”, — deya qo‘shimcha qildi u.