AQSHning 42-prezidenti Bill Klinton 1994-yilda Ukraina hukumatini Sovet yadro arsenalidan voz kechishga ko‘ndirganidan afsusda ekanini aytdi. Bu haqda Klinton Irlandiyaning RTE teleradiokompaniyasi efirida gapirdi.
“Men shaxsan javobgarlik his qilyapman, chunki ularni (Ukraina) yadroviy qurollaridan voz kechishga ko‘ndirgandim. Ular Ukrainada yadroviy qurol bo‘lganida, Rossiya hozirgi nayrangini boshlamagan bo‘lardi, deb hisoblaydi”, — dedi Klinton.
U Rossiya prezidenti Vladimir Putin yadroviy quroldan voz kechish evaziga Ukraina xavfsizligini kafolatlovchi kelishuvga rioya qilmayotganini ta’kidladi. Klinton ushbu shartnomani Rossiya va Ukraina prezidentlari Boris Yeltsin va Leonid Kravchuk bilan imzolagan edi.
Bill Klintonning qo‘shimcha qilishicha, o‘shanda Ukraina tomoni yadroviy quroldan voz kechishdan qo‘rqqan, chunki ular bu mamlakatni Rossiya ekspansiyasidan himoya qiladigan yagona narsa deb o‘ylashgan. “Prezident Putin o‘ziga qulay vaqt kelganida uni (kelishuvni) buzdi va birinchi qilgan ishi Qrimni egallash bo‘ldi. Men buning uchun o‘zimni juda yomon qis qilaman chunki Ukraina juda muhim davlat”, — dedi Klinton.
SSSR parchalanganidan keyin yadro qurollari Ukraina hududidan olib ketilgan edi. Ukraina mamlakat xavfsizligini kafolatlagan Budapesht memorandumi doirasida yadroviy maqomdan voz kechgan. Memorandum Ukraina, Rossiya, AQSH va Buyuk Britaniya tomonidan imzolangan.
Izoh (0)