Ukraina 5—7 oy ichida Qrimni deokkupatsiya qilishi mumkin. Shu bilan birga, urush Ukrainaning butun hududi ozod qilinmaguncha davom etadi. Bu haqda Ukraina prezidenti ofisi rahbarining maslahatchisi Mixail Podolyak “Ozodlik radiosi”ga bergan intervyusida aytdi.
“Biz, albatta, juda qisqa vaqt ichida, tarixiy nuqtai nazardan, olti, besh yoki yetti oyda Qrimda bo‘lamiz. Balki juda optimistik tuyular, ammo bu matematik jihatdan tasdiqlangan optimizm”, — deb ishontirdi u.
Podolyakning so‘zlariga ko‘ra, Rossiyada yarimoroldagi vaziyatni nazorat ostida ushlab turish uchun yetarli resurslar yo‘q.
“Urush mantig‘i mutlaqo ravshan va biz Yalta sohilidagi Qrim haqiqatlari haqida aniq qilib gapira olamiz. Biz Qrimning mutlaqo porloq kelajagi haqida aniq aytishimiz mumkin”, — deya qo‘shimcha qildi u.
Shu bilan birga, u Qrim uchun urush Rossiya tomonidan Ukrainaning muayyan bosib olingan hududini qaytarish sifatida bo‘lmasligini, balki “demokratik dunyo uchun bo‘lishini” ta’kidladi.
“Hudud uchun urush ketmayapti, hudud faqat urush elementlaridan biri. Bugungi kunda sivilizatsiyalashgan dunyoning mavjudlik huquqi uchun urush bormoqda. Va bu sivilizatsiyalashgan dunyoda Rossiyaga hozirgi shaklida joy yo‘q. Shuning uchun urush Ukrainaning butun hududi ozod qilinmaguncha, albatta, davom etadi”, — dedi Podolyak.
Avvalroq Ukraina Milliy xavfsizlik va mudofaa kengashi Qrimini deokkupatsiya qilishda qo‘llaniladigan rejani ishlab chiqayotgani xabar berilgandi. Reja 12 bosqichni o‘z ichiga oladi.
Izoh (0)