Ёқуб Аҳмедовнинг куёви, маҳоратли актёр ва омадли тадбиркор: 45 ёшни қарши олган Рихситилла Абдуллаев ҳақида кўпчилик билмайдиган маълумотлар

Салбий ролларни қойилмақом ижро этадиган актёр Рихситилла Абдуллаев 5 апрель куни 45 ёшни қаршилади. Нафақат ижодда, балки ҳаётдаги ҳам ўта нозиктаъб бўлган ижодкор бошқа ҳамкасблари сингари моддий қийинчиликларни бошдан кечирмаган бўлса-да, осонликча машҳур инсонга айлангани йўқ. 

Тадбиркорлар оиласида туғилган ижодкор

Актёр Тошкент шаҳрида, тадбиркорлар оиласида дунёга келган. Унинг оиласида тўрт ўғил бўлиб, Рихситилла Абдуллаев уларнинг кенжаси ҳисобланади. Гарчи оила аъзолари орасида санъаткорлар бўлмаса-да, у болаликдан санъатга меҳр қўяди.

— Болалигимиз кўп қаватли уйда ўтган. У пайтлари ҳамманинг уйида ҳам телевизор, видеомагнитафон бўлмасди. Дадам хориждан видеомагнитофон олиб келган. Ёзги таътилда болалар уйда зерикиб, бизникига чиқарди. Талаб юқори бўлиб кетганидан кейин техникани биринчи қаватдаги ҳовлига олиб чиқишга қарор қилганмиз. Кейин хаёлимга томошани пулли қилиш ғояси келган. Ота-оналар ҳам болалари кўз олдиларида эканлигидан хурсанд бўлиб, пул беришарди. Аммо кўп ўтмай қизиқиш пасайган. Чунки болаларга биздаги мултфильмлар ёд бўлиб кетганди. Кейин театр томошаларини саҳналаштириш ғояси пайдо бўлган. Балки ишонмассиз, аммо биз саҳналаштирган томошаларда махсус кийимлар, реквизитлар бор эди, — дейди актёр Рихситилла Абдуллаев.

Имтиҳонда кўриниши қўл келган

Рихситилла Абдуллаев Юнусобод туманидаги 272-мактабни тамомлаб, ҳозирги Ўзбекистон давлат санъат ва маданият институтига ҳужжат топширади. Бўйлари баланд, аслзодаларга хос кўринишдаги абитуриент ижодий имтиҳон оладиган устозларда қизиқиш уйғотган. Боиси Драма актёрлиги бўлимига актёр танланаётганда нафақат унинг иқтидори, балки ташқи кўриниши ҳам ҳисобга олинади.

— 1999 йилда институтни тамомлаб, шахдам қадамлар билан театрга ишга келганман. Албатта, штат асосида ишга олинишим осон бўлмаган. Шу орада “Тошкент” телеканали буюртмасига кўра “Қирқ тоғоранинг қирқ ноғораси” номли сериал суратга олинадиган бўлди. Театрдаги барча актёрлар унга таклиф этилди. Улар орасида мен ҳам бор эдим. Ролим жуда кичик бўлса-да, одамларнинг ёдида қолди, — дейди Рихситилла Абдуллаев.

Раҳбарининг қизига кўнгил қўйган

Рихситилла Абдуллаев Ўзбекистон халқ артисти Ёқуб Аҳмедовнинг тўнғич қизи Нодира Аҳмедова билан оила қурган. Ўша пайтда Ёқуб Аҳмедов Ўзбек миллий академик драма театрининг директори эди. Раҳбарнинг қизига кўнгил қўйган оддий актёрнинг қайнотасидан розилик олиши осон кечмаган.

— Оила қуришимиз жуда қизиқ кечган. Нодиранинг яқин дугонасига кўнгил қўйгандим. У ҳақдаги маълумотларни Нодирадан олиб турардим. Аммо анча вақтгача уни Ёқуб Аҳмедовнинг қизи эканлигини билмаганман. Кейин Нодирадаги устун жиҳатларни кўриб, унга совчи юборишга қарор қилдим. У театр раҳбарининг қизи эканлигини билганимда сичқоннинг ини минг танга бўлиб кетган. Февраль ойида совчиларни юборган бўлсам, июнга қадар кўзларига кўринмай юрганман. Ҳатто мажлисларга кирганда ҳам бир чеккада индамай ўтирардим ва биринчи бўлиб хонадан чиқиб кетардим, — дейди актёр.

Қайнотанинг куёвига илтимоси

Нодира ва Рихситилла Абдуллаевнинг Тожираҳмон, Аслзода ва Моҳизода исмли фарзандлари бор. Ёқуб Аҳмедов улардан тўнғич фарзандларининг исмини Тожираҳмон деб қўйишни илтимос қилган. Чунки устоз санъаткор набирасига отасининг исмини қўйишни орзу қилган экан. 

Рихситилла Абдуллаев нафақат кинода, балки театрда ҳам сермаҳсул ижод қилган. “Қирол Лир”, “Макр ва муҳаббат” каби хориж классикасида рол ижро этган. Унга “Навоий” спектаклида бош ролни ижро этиш бахти ҳам насиб этган.

Актёр катта кинодаги илк ролини “Муҳаббат синовлари”да ижро этган. Аммо мазкур эпизод рол унга машҳурлик келтирмаган. Орадан уч йил ўтиб, Рустам Саъдиев уни “Келгинди куёв” фильмига таклиф этган. Суюнбек роли актёрнинг комик маҳоратини кўрсатишга туртки бўлган. Орадан 18 йил ўтган бўлишига қарамай Суюнбек томошабинларнинг энг севимли қаҳрамонларидан бири бўлиб қолган.

“Қайнотамдан кўп танбеҳ эшитганман”

Рихситилла Абдуллаев деганда кўз олдимизга асилзода, имижига эътиборли актёр келади. У либослари ва майда аксессуарлар учун ҳам катта маблағ сарфлайди.

— Бу борада қайнотамдан ҳам кўп марта танбеҳ эшитганман. Қимматбаҳо, бежирим нарсаларни яхши кўраман. Ҳатто соат ва бўйинбоғ учун ҳам кўп пул сарфлайман. Оила қурмасимдан аввал кийим-бошимни тартибга келтириш учта келинойимнинг вазифаси эди. Улар қайси ишни яхши қилишларига қараб, ишни тақсимлардим. Яъни бир келинойим шимни, бошқаси эса кўйлакни дазмоллашга уста эди. Ҳозир бу ишларни аёлимнинг ўзи бажаради, — дейди актёр.

Унинг турмуш ўртоғи Нодира Абдуллаева инглиз тили ўқитувчиси. Актёр аёлининг ишлаши ва тажриба орттиришига қаршилик қилмай, уни қўллаб-қувватлайди.

Рихситилла Абдуллаев ижоддан ташқари, тадбиркорлик билан ҳам шуғулланади. Унинг саёҳатлар уюштирадиган ва тўй оқшомларини ташкил этадиган фирмалари бор.

Актёрнинг ўғли Тожираҳмон Ниғматуллаев отасининг касбини давом эттиришга қарор қилган. У айни кунда актёрлик бўйича таҳсил олиб, театрда кичик ролларни ижро этади.

“Дилноза Кубаевани рашк қиламан”

Актёр интервьюларининг бирида ҳамкасби Дилноза Кубаева билан нега рол ижро этишни ёқтириши ва уни бошқа актёрлардан қизғаниши ҳақида гапириб берган.

— Дилноза билан илк марта "Андишали келинчак" спектаклида партнёр сифатида ишлаганмиз. Мен Арслонбек, Дилнозахон Олмахон ролини ижро этган.

Дилнозани партнёр сифатида рашк қиламан. Рустам Саъдиев ва Гулчеҳра Жамилова, Лола Элтоева ва Алишер Ҳамроев, Зуҳра Ашурова ва Бекзод Муҳаммадкаримов каби томошабинларнинг севимли киножуфтликлари бор. Умуман олганда, ҳамма актёрнинг ўз партнёри бор.

Кўп мухлислар Дилноза Кубаева билан чиройли жуфтликсиз, деб айтади. Дилноза билан ҳозирда ‘Ўзбекча ажрашиш’ деган кинода эр-хотинлар образини гавдалантирмоқдамиз. У янги фильмда маҳалла раиси ролини ижро этади, — дейди Рихситилла Абдуллаев.