Nojo‘ya taklifni rad etib, “zapret”ga tushgan, zo‘ravon eri tufayli muhojirga aylangan Nargiza Abdullayevaning hayoti va ijodi haqida

Tomoshabinlarning sevimli “buvijoni”siga aylangan Nargiza Abdullayeva 3-aprel kuni 43 yoshni qarshiladi. 17 yoshida kino olamiga kirib kelgan ijodkor o‘tgan yillar mobaynida turli-tuman rollarni ijro etdi. Hayotda ko‘plab qiyinchiliklarni yengib o‘tgan va mehnatkashligi bilan xalq mehrini qozongan aktrisaning hayot yo‘liga nazar tashlaymiz.

“Ustozlarim raqs tushsam quvonishardi”

— Toshkentda yashasak ham oilamiz o‘zbekona, kamtarona hayot kechirardi. Dadam rahmatli aloqa sohasida ishlardi. Onam esa ancha yillar tibbiyot xodimi bo‘lgan. Ularning tanishuvi juda qiziq kechgan ekan. Dadam kichik yo‘l-transport hodisasiga uchrab, tan jarohati sabab shifoxonaga borgan. Onam esa yaxshi muomala qilgani uchun dadamning ishqi tushib, uylangan ekan, — deydi aktrisa Nargiza Abdullayeva.

Aktrisaning oilasida san’atkorlar yo‘q, uch nafar aka-opalari ham san’atdan yiroq sohalarda faoliyat yuritishadi. Nargiza Abdullayeva esa bolalikdan raqqosalikka mehr qo‘yadi. 

— A’lo baholarga o‘qiganman deyolmayman. Ammo tartibli va faol o‘quvchi edim. To‘qqiz yil maktabda o‘qib biror marta darsdan qochganimni eslolmayman. Yuqori sinfga o‘tgach, darsdan keyin raqs to‘garagiga qatnay boshladim. Ba’zan konsertlar sabab darslarga borolmasdim. Tadbirlarda raqs tushib bersam ustozlarim rosa quvonishardi, — deydi aktrisa Nargiza Abdullayeva.

“Qora qiz”ning san’atga kirib kelishi

Nargiza Abdullayeva 1997-yili san’atkor bo‘lishga jiddiy ahd qildi. Konsertlarda raqs tushib, san’atda o‘z o‘rnini topishga intilayotgan kezlarda uni “Charxpalak” serialiga taklif etishdi. Buvijon roli aktrisaga kutilmagan mashhurlikni olib keldi. U serial bunchalik muvaffaqiyatga erishishini va ko‘cha-ko‘yda odamlar undan dastxat olishlarini kutmagandi.

— Dugonam bilan televideniyega borganmiz. Uni kinosinovga taklif etishgan edi. U ichkariga kirib ketganida "Meni ham taklif etishsa edi" deb chin dildan niyat qilgandim. Qop-qoragina qiz bo‘lganim uchun meni chaqirishlarini kutmagandim. Yarim soatdan keyin "Siz ham proba topshirmaysizmi?" degan taklif bo‘ldi, — deydi aktrisa.

Birinchi turmushi omadsiz kechgan

Aktrisa yanada yaxshiroq ijod qilish haqida o‘ylab yurgan paytida uyidan sovchilarning qadami uzilmay qolgandi.

— Birinchi turmush o‘rtog‘imga teggim kelmagan. Men san’atdaman, ishlashim kerak deganman. Lekin taqdir ekan, to‘yimiz bo‘lib ketdi. Keyin bilsam, meni sevib olmagan. Meni kinoga chiqqanim uchun o‘rtoqlari bilan bahslashib olgan — o‘zlari tan olganlar. O‘rtoqlari ham aytib qo‘ygan. Mehr bo‘lmagan, e’tibor bo‘lmagan umuman.

Keyin biz o‘rta hol bo‘lganmiz, ular mendan ko‘p narsa kutishgan. Ota-onam ham borini qildi, borini kiydirgan. U payt 40 ta tog‘ora bo‘lmasa, sizning obro‘yingiz to‘kilgan payt bo‘lgan. Ota-onam rosa qiynalgan, qizim uchun deb qilishgan. Lekin baribir bo‘lmadi. Bo‘lgan gaplarni hammasini ayta olmayman. Avvaliga ajrashmaganlar, juda qiyin bo‘lgan. Ketib qolardim, uyimga kelib, mashinaga solib olib ketardilar, bo‘g‘ardilar. Aybim o‘rta hol bo‘lganim edi, — deydi aktrisa Nargiza Abdullayeva.

“Ikkinchi xotin bo‘lish baxt emas”

Aktrisa ilk turmushidan so‘ng ko‘plab qiyinchiliklarga uchradi. Odamlarning gap-so‘zi uni charchatganini ham intervyularida aytib o‘tgan.

— “Artist-da. erga tegib ajrashish oson”, degan gap dilimga og‘ir botardi. Undan chalg‘ish uchun san’atdan yiroqlashmoqchi ham bo‘ldim. Ammo keyinchalik nega odamlarning gap-so‘zi uchun o‘zimni o‘zgartirishim kerak. Alloh menga san’atdan rizqimni berayotgan bo‘lsa deb o‘zimni o‘zgartirmaslikka qaror qildim, — deydi Nargiza Abdullayeva.

Aktrisa o‘zini qo‘lga olish uchun Rossiyaga boradi. U yerda yaqin qarindoshlari oilasi bilan istiqomat qilardi. Aktrisa u yerda Ozodbek ismli asli samarqandlik bo‘lgan yigit bilan tanishib qoladi. U yigit hali oila qurmagan va Nargiza Abdullayevaning aktrisa ekanligini ham bilmasdi.

— Ikkinchi oila taklifi ham bo‘lgan, yashirmayman. Hashamatli uy-joy, qimmat mashina, xohlagan joyingizga borasiz, lekin bu mening baxtimmas. Buni men baxt deb bilmayman. Birovning erini bekitib olib yurib ko‘chada... Uniki u, meniki emas... Yaxshi kunlarini men bilan o‘tkazmaydi, to‘y-hashamlarda yonimda turib bera olmaydi. Bu baxtmas. Agar mening niyatim bo‘lganida shu ishlarni qilib ketgan bo‘lardim, qilmadim. O‘zimni tushunadigan, o‘zimning yonimda erim bo‘lsin. Bolalarim ‘Dadam kim, qani?’ deganida ko‘rsata oladigan bo‘lay, deb kutdim.

Ozod aka turmush qurish taklifini berganida avvaliga ikkilanganman. Taqdir ekan oila qurdik. Ikki nafar farzandli bo‘ldik, baribir er-xotin bir-birini tushunib yashashi qiyin ekan, — deydi aktrisa.

“Ba’zan ayolning dushmani er bo‘larkan”

Aktrisa oilasidagi qiyinchiliklar haqida ko‘p intervyularida aytib o‘tgan. 

— Oila deb atalmish maktabda ham ancha haqiqatlarni anglab yetdim. Ayol faqat o‘zini qurbon qilib egilaversa, uni ayamasdan tepib o‘tisharkan. Ko‘pni ko‘rgan onaxonlarimiz bekorga ayol sirli xilqat bo‘lishi, hattoki oilada ham barcha sirlarni ochib tashlamaslik kerakligi haqida uqtirishmas ekan. Eng katta dushmaning turmush o‘rtog‘ing, degan haqiqatning borligi ham juda qiziq. Chindan ham yillar davomida eng yaqin sirdoshingga aylangan, barcha sirlaringdan voqif bo‘la turib, keyin ayovsiz ravishda yuzingga soladigan inson dushman bo‘lmay kim?!, — deydi aktrisa.

San’atkor ayol bo‘ladimi, erkak bo‘ladimi, har ikkalasiga oson tutmang. Uning o‘zi emas, balki aynan turmush o‘rtog‘i yulduzlik kasaliga chalinsa-chi? Taniqli va sevimli jufti haloli uchun xursand bo‘lish o‘rniga g‘ayirlik qilsa, buning natijasi yaxshilik bilan tugaydimi? Kasbingizdagi aslida sizga hech qanday aloqasi bo‘lmagan ba’zi bir noxush holatlar deb boshingiz baloga qolib ketishi ham san’atkor ayolni qiynaydigan vaziyatlardan biri. Bora-bora hammaning oldida o‘zingni baxtli ko‘rsatib, qon yutib yashashdan charchar ekansan...

Ochig‘ini aytsam, shu kungacha bergan intervyularimda yolg‘on gapirib charchadim. Endi haqiqatni aytmoqchiman. Shu paytgacha ayyor rafiqa bo‘lgin, degan gaplarga e’tibor bermasdim. Turmush o‘rtog‘im uchun doim ochiq bo‘lishim shart degan qoida bilan yashadim. Bundan pand yedim. Ayol kishi oilaning, ro‘zg‘orning yukini nozik yelkasida ko‘tarib yurishdan charchar ekan. Kezi kelganda o‘z himoyachisiga suyanib, erkalik qilishni istaydi. Qachonki oilada erkak va ayolning vazifalari almashib qolar ekan, bunday munosabatlarga darz ketadi, — deya o‘z ko‘ngil kechinmalari bilan bo‘lishgan aktrisa.

“Jazman bo‘lmaganim uchun san’atdan uzoqlashtirishdi”

Aktrisa san'atdagi nopok insonlar sabab bu sohadan ko‘ngli qolgani va odamlarga ishonmay qo‘ygani haqida ham aytib o‘tgan.

— Juda katta takliflar tushgan. Ularning taklifiga ko‘nmaganim uchun meni san’atdan olib tashlashgan. Shunaqa qo‘li hamma yoqqa yetadigan insonlar bor edi. Men ularning jazmani bo‘lmaganim uchun san’atdan uzoqlashishimga to‘g‘ri kelgan. Qarang, hayotni? Men ham ayrim insonlarga o‘xshab san’atda chiqishim kerak ekan. Menga uy, mashina olib beryapti-ku, nima qilibdi ikkinchi, uchinchi xotin bo‘lib yursam, desam bo‘lardi-ku?! Lekin nima qilaman birovning baxtini yarim qilib. Shuning uchun ham men san’atdan ketdim orada, yo‘q bo‘lib qoldim. Chunki menga yo‘l berishmadi”, — deydi Nargiza Abdullayeva.

Oshkor etilmaydigan sir

2006-yili “O‘zbektelefilm” kinostudiyasida “Maftuna” nomli serial suratga olingan. Rassom yigitga ko‘ngil qo‘ygan talaba qiz taqdir taqozosi bilan yetim bolaning boshini silashiga to‘g‘ri keladi. Ammo buni odamlar turlicha talqin qilishadi. Aktrisa Sitora Farmonova ijrosidagi Maftuna roli aslida Nargiza Abdullayevaga nasib etishi kerak edi. Ammo suratga olish ishlariga bir necha kun qolganida aktrisa roldan mosuvo bo‘lgan. Nargiza Abdullayeva nima sababdan bunday bo‘lganini yaxshi biladi, ammo ommaga oshkor etishni istamaydi.

Kotibalik ham qildi

Nargiza Abdullayeva bir muddat "Akfa-media" prodyuserlik kompaniyasida kotiba sifatida ham faoliyat yuritgan. Ziyoda, Oybek va Nigora va “Bojalar” guruhining san’atda o‘z o‘rnini topishiga ozmi, ko‘pmi hissa qo‘shgan.

— Kiyimlarini dazmollardim, klip olinsa ham barcha yugur-yugur ishlar mening zimmamda edi. Ular bilan juda yaqin bo‘lib ketgandik. Ammo yillar o‘tib hamma o‘z yo‘lida davom etar ekan, — deydi aktrisa.

Nargiza Abdullayevaning ijodi haqida gapirish shart emas. Chunki uning rollarini tomoshabinlar juda yaxshi bilishadi. “Begona bahor”, “Jiyda guli”, “Hijron” kabi film va seriallardagi rollari tomoshabinlar mehrini qozongan. Ko‘pincha ma’suma o‘zbek ayollari rolini qoyilmaqom ijro etadigan aktrisa hayotda ham xuddi shunday inson.