O‘zbekiston Gruziya bilan alkogolli ichimliklar ishlab chiqarish bo‘yicha klasterlar yaratish bo‘yicha qo‘shma loyihalarni amalga oshirishi mumkin. Bu haqda Investitsiyalar, sanoat va savdo vazirligi axborot xizmati xabar berdi.
Xabarga ko‘ra, Toshkentda bosh vazir o‘rinbosari Jamshid Xodjayev hamda Gruziya Bosh vaziri o‘rinbosari, iqtisodiyot va barqaror rivojlanish vaziri Levan Davitashvili raisligida Savdo-iqtisodiy hamkorlik bo‘yicha O‘zbekiston-Gruziya hukumatlararo komissiyasining 9- yig‘ilishi bo‘lib o‘tdi. Unda tegishli vazirlik va idoralar, ikki mamlakat ishbilarmon doiralari vakillari ishtirok etdi.
Uchrashuvda investitsiyaviy, sanoat, savdo-iqtisodiy va madaniy-gumanitar sohalardagi hamkorlikni yanada rivojlantirish masalalari muhokama qilindi. Hukumatlararo muloqot doirasida o‘zaro tovar ayirboshlash hajmi o‘sishining ijobiy tendensiyasi qayd etildi. Oxirgi 6 yil ichida ikki davlat o‘rtasidagi tashqi savdo aylanmasi qariyb ikki barobar oshdi. Birgina o‘tgan yilning o‘zida O‘zbekiston va Gruziya o‘rtasidagi tovar ayirboshlash hajmi 30 foizdan ortiq oshdi.
Tomonlar yaqin yillarda tovar ayirboshlash hajmini 500 million dollarga yetkazishga kelishib oldi. Ushbu maqsadga erishish uchun ikki hafta muddatda o‘zaro savdo missiyalarini, shuningdek, ikki davlat sanoat mahsulotlari ko‘rgazmalarini tashkil etish chora-tadbirlarini qamrab olgan 2023-2024-yillarga mo‘ljallangan savdo-iqtisodiy hamkorlikni yanada chuqurlashtirish bo‘yicha amaliy chora-tadbirlar rejasini ishlab chiqish va tasdiqlash taklif etildi.
Qayd etilishicha, Gruziya va O‘zbekistonning barcha hududlarini qo‘shma loyiha va tashabbuslarga jalb etib hamkorlikni rivojlantirishga alohida eʼtibor qaratildi. Shu munosabat bilan birinchi bosqichda Samarqand va Batumi, shuningdek, Buxoro va Mtsxeta o‘rtasida ikki tomonlama sheriklik aloqalarini o‘rnatish taklif etildi.
Tomonlar sanoat kooperatsiyasini yo‘lga qo‘yish dolzarbligini, uning doirasida ilg‘or farmatsevtika mahsulotlari, tayyor qishloq xo‘jaligi mahsulotlari, mineral o‘g‘itlar, shuningdek, alkogolli ichimliklar ishlab chiqarish bo‘yicha klasterlar yaratish bo‘yicha qo‘shma loyihalarni amalga oshirish imkoniyatlarini ko‘rib chiqdi.
Shuningdek, tomonlar transport-logistika sohasidagi hamkorlikni rivojlantirish, xususan, Boku-Tbilisi-Kars transport yo‘lagi va Gruziyaning rivojlangan Qora dengiz porti infratuzilmasidan foydalanishni kengaytirishga alohida eʼtibor qaratdi. Tadbir yakunlari bo‘yicha qator ikki tomonlama hujjatlar, jumladan, yig‘ilishning yakuniy bayonnomasi, O‘zbekiston Hukumati va Gruziya Hukumati o‘rtasida texnik jihatdan tartibga solish, standartlashtirish, metrologiya va muvofiqlikni baholash sohasida hamkorlik to‘g‘risidagi bitim, shuningdek, O‘zbekistonning Jahon savdo tashkilotiga (JST) qo‘shilishi doirasida Gruziya va O‘zbekiston o‘rtasida tovar va xizmatlar bozoriga chiqish bo‘yicha ikki tomonlama muzokaralarni yakunlash to‘g‘risidagi bayonnoma imzolandi.
Izoh (0)