Qatl, ochlik va zo‘rlash: Shimoliy Koreya qamoqxonalaridagi hayot qanday?

Shimoliy Koreyadan qochib ketishga muvaffaq bo‘lgan sobiq mahbuslar qamoqxonalardagi sharoitlar haqida gapirdi. Ularning ko‘rsatmalari Korea Future inson huquqlari tashkiloti hisobotida keltirib o‘tildi. Bu haqda CNN xabar berdi.

Sobiq mahbuslarga ko‘ra, Shimoliy Koreya qamoqxonalarida sudsiz qatl qilish, zo‘rlash, majburiy abort qilish, qiynoqlar sodir etilgan. Ularga deyarli ovqat berilmagan, shuning uchun ba’zi mahbuslar hasharotlarni yeyishga majbur bo‘lgan.

Huquq himoyachilari mamlakatdan qochishga muvaffaq bo‘lgan sobiq mahbuslar bilan yuzlab suhbatlar o‘tkazgan. Ulardan rasmiy hujjatlar va sun’iy yo‘ldosh tasvirlarini ham olgan.

“Sovet axloq tuzatish mehnat lagerlariga nisbatan Shimoliy Koreya jazoni ijro etish tizimi sud tomonidan hukm qilingan shaxslarni xavfsiz va insonparvar muassasalarda saqlash va reabilitatsiya qilishga mo‘ljallanmagan. Bu Kim Chen Inning hukumatiga qarshi bo‘lgan odamlarni jamiyatdan ajratib qo‘yish maqsadida amalga oshiriladi”, — deyiladi tashkilot bayonotida.

Korea Future Shimoliy Koreyaning har bir provinsiyasida 206 ta qamoqxonani topishga muvaffaq bo‘ldi. Qonunbuzarliklarga shaxsan yuqori martabali amaldorlar, general-mayorlar yo‘l qo‘yishi aniqlangan.

Hisobotda Shimoliy Koreya razvedka idoralarining o‘z aholisiga qarshi jinoyatlari ham o‘rin olgan. Misol uchun, chegarani kesib o‘tishga uringan uch kishi qamoqqa tashlangan. Ular orasida ayol ham bo‘lib, u homiladorlikning yettinchi yoki sakkizinchi oyida abort qilishga majburlangan. Yana bir odamga kuniga atigi 80 gramm makkajo‘xori berilgan, natijada uning vazni bir oy ichida 60 kilogrammdan 37 kilogrammgacha tushib ketgan. U ovqatni o‘rnini to‘ldirish uchun suvarak va kemiruvchilarni iste’mol qilishga majbur bo‘lgan.

Qamoqxonadagi qiyinchilikni boshdan kechirgan yana boshqa guvohlar hayvonlarning ovqatini iste’mol qilishgani, oqibatda ozib ketishganini aytdi. Ular zo‘rlash va qattiq kaltaklanishga ham guvoh bo‘lganini bildirdi.

Bundan tashqari, BMT o‘z tergovida inson huquqlari faollari bilan bir xil xulosaga kelgan. Inson huquqlari tashkiloti hisobotida aytilishicha, siyosiy qamoq lagerlarida saqlanayotgan ayollar Shimoliy Koreya rasmiylari tomonidan qiynoq va shafqasiz muomala, majburiy mehnat hamda jinsiy zo‘ravonlikka duchor bo‘lgan.