Putin armiyaga bahorgi chaqiruv to‘g‘risidagi farmonni imzoladi

Rossiya prezidenti Vladimir Putin armiyaga bahorgi chaqiruv to‘g‘risidagi farmonni imzoladi. Hujjat huquqiy axborotning rasmiy internet portalida e’lon qilindi.

“2023-yil 1-apreldan 15-iyulgacha Rossiya Federatsiyasining 18 yoshdan 27 yoshgacha bo‘lgan, zaxirada bo‘lmagan va muddatli harbiy xizmatga chaqirilishi kerak bo‘lgan fuqarolarini 147 ming kishi miqdorida muddatli harbiy xizmatga chaqirish amalga oshirilsin”, — deyiladi farmon matnida.

Rossiyada 2022-yilning kuzida 120 ming, 2022-yilning bahorida esa 134,5 ming kishi harbiy xizmatga chaqirilgan.

30-mart kuni Davlat dumasi mudofaa qo‘mitasi raisi Andrey Kartapolov Rossiya armiyasida harbiy xizmatga chaqirilgan rossiyaliklar Donetsk va Lugansk, shuningdek, Zaporojye va Xerson viloyatlariga xizmatga yuborilmasligini aytgandi. Shuningdek, u federatsiyaning yangi subyektlarida bahorgi muddatli harbiy xizmatga chaqiruv bo‘lmasligini aytgandi.