Oqqo‘rg‘onda o‘quvchilarni “Tashabbusli budjet”ga ovoz yig‘ish uchun jalb qilish topshirig‘i direktor tomonidan berilgani aniqlandi

Toshkent viloyatining Oqqo‘rg‘on tumanidagi 17-maktab o‘quvchilari darsga kiritilmay, SIM karta sotib olish uchun uylariga jo‘natilgani haqida xabar berilgandi.

Viloyat hokimligi axborot xizmatiga ko‘ra, mazkur holat hokimning topshirig‘iga asosan maxsus ishchi guruh tomonidan o‘rganilgan. O‘quvchilarni “Tashabbusli budjet”ga ovoz yig‘ish uchun jalb qilish bo‘yicha topshiriq maktab direktori tomonidan berilgani aniqlangan.

Vaziyat mazkur maktabning filialida sodir bo‘lgan. Filialda 45 nafar boshlang‘ich sinf o‘quvchisi tahsil oladi. O‘quvchilarni kampaniyaga jalb qilgan sinf rahbarlariga intizomiy jazo berildi, maktab direktori L.Usmanova egallab turgan lavozimidan ozod qilingan.

Maktab filiali yaqinda ta’mirdan chiqarilgan bo‘lib, zarur jihozlar bilan ta’minlangan. Maktab jamoasi o‘z tashabbusi bilan “Tashabbusli budjet” kampaniyasida qo‘shimcha elektron doska, kompyuter jihozlari olish uchun ishtirok etgan. So‘ralgan mablag‘ miqdori — 300 million so‘m.

Toshkent viloyati hokimi, viloyat Ta’lim kengashi raisi Zoir Mirzayev tegishli mutasaddilarga ushbu jihozlarga ehtiyoj haqiqatda mavjudligini o‘rganish, shundan so‘ng mahalliy budjet hisobidan maktabni so‘ralgan jihozlar bilan ta’minlash bo‘yicha ko‘rsatma bergan.   

Toshkent viloyati hokimligi bugungi kunda keng ommalashib, xalq ovoziga aylanib borayotgan “Open budjet” kampaniyasini bunday talqin qilish, bolalardan foydalanishni qat’iyan qoralagan. Bundan tashqari, Maktabgacha va maktab ta’limi vazirligi bu holat qolgan maktablarda takrorlanmasligiga ishonch bildirib, maktabga o‘qituvchi dars bergani, bolalar esa ta’lim olish uchun borishini eslatgan.