Jizzax viloyati hokimligi 17—28-mart kunlari 465 million so‘mlik tender o‘tkazgan. “Daryo” muxbiri lot ma’lumotlarini ko‘zdan kechirish jarayonida 8-mart — Xalqaro xotin-qizlar kuniga atalgan sovg‘alarni topshirish muddati o‘tib ketganini aniqladi.
O‘tkazilgan tender 28-mart kuni yakunlangan. Lekin lot ma’lumotlariga ko‘ra, sovg‘alar 8-mart — Xalqaro xotin qizlar kuni arafasida topshirilishi ko‘zda tutilgan. G‘olib tadbirkor hokimlikka 455 tadan ayollar sumkasi, 2 juft chinni serviz, shokolad kolleksiyasi va 55 dona personli serviz yetkazib berishi kerak.
Tenderda ikkita tadbirkorlik subyekti ishtirot etgan bo‘lib, “Mubina-Minisa Kapital” MCHJ g‘olib deb topilgan, Azboa-Uz MCHJ esa zaxira g‘olib sifatida ko‘rsatilgan.
“Sovg‘ani kecha topshirdik”
“Daryo” holat yuzasidan izoh olish maqsadida Jizzax viloyati hokimligi hisobchisi Abror Umarov bilan bog‘landi. Uning aytishicha, lot “etender.uzex.uz” portaliga kechroq qo‘yilgan.
Muxbirning “Sovg‘alar egalariga bayramdan 21 kun o‘tib berilganmi?” degan savoliga hisobchi “Ha”, deb javob berdi.
“Biz mahsulotlarni yetkazib berganmiz”
“Daryo” tenderni yutib olgan “Mubina—Minisa Kapital” MCHJ rahbari Mayxonoy Odilova bilan bog‘lanib, holat yuzasidan izoh so‘radi. Uning aytishicha, sovg‘alar olib kelib topshirilgan.
“Biz ro‘yxatda ko‘rsatilgan mahsulotlarni oldinroq olib borib berganmiz”, — dedi Mayxonoy Odilova.
Ma’lumot uchun, Jizzax viloyatida 8-mart — Xalqaro xotin-qizlar kuni munosabati bilan o‘tkazilgan bayram tadbiri 3-mart kuni bo‘lib o‘tgan.
Tegishli tashkilot va idoralardan holatga munosabat bildirishni kutib qolamiz. “Daryo” voqealar rivojini kuzatishda davom etadi.
Izoh (0)