Оққўрғонда ўқувчиларни “Ташаббусли бюджет”га овоз йиғиш учун жалб қилиш топшириғи директор томонидан берилгани аниқланди

Тошкент вилоятининг Оққўрғон туманидаги 17-мактаб ўқувчилари дарсга киритилмай, SIM карта сотиб олиш учун уйларига жўнатилгани ҳақида хабар берилганди.

Вилоят ҳокимлиги ахборот хизматига кўра, мазкур ҳолат ҳокимнинг топшириғига асосан махсус ишчи гуруҳ томонидан ўрганилган. Ўқувчиларни “Ташаббусли бюджет”га овоз йиғиш учун жалб қилиш бўйича топшириқ мактаб директори томонидан берилгани аниқланган.

Вазият мазкур мактабнинг филиалида содир бўлган. Филиалда 45 нафар бошланғич синф ўқувчиси таҳсил олади. Ўқувчиларни кампанияга жалб қилган синф раҳбарларига интизомий жазо берилди, мактаб директори Л.Усманова эгаллаб турган лавозимидан озод қилинган.

Мактаб филиали яқинда таъмирдан чиқарилган бўлиб, зарур жиҳозлар билан таъминланган. Мактаб жамоаси ўз ташаббуси билан “Ташаббусли бюджет” кампаниясида қўшимча электрон доска, компьютер жиҳозлари олиш учун иштирок этган. Сўралган маблағ миқдори — 300 миллион сўм.

Тошкент вилояти ҳокими, вилоят Таълим кенгаши раиси Зоир Мирзаев тегишли мутасаддиларга ушбу жиҳозларга эҳтиёж ҳақиқатда мавжудлигини ўрганиш, шундан сўнг маҳаллий бюджет ҳисобидан мактабни сўралган жиҳозлар билан таъминлаш бўйича кўрсатма берган.   

Тошкент вилояти ҳокимлиги бугунги кунда кенг оммалашиб, халқ овозига айланиб бораётган “Open budjet” кампаниясини бундай талқин қилиш, болалардан фойдаланишни қатъиян қоралаган. Бундан ташқари, Мактабгача ва мактаб таълими вазирлиги бу ҳолат қолган мактабларда такрорланмаслигига ишонч билдириб, мактабга ўқитувчи дарс бергани, болалар эса таълим олиш учун боришини эслатган.