Isroil prezidenti Isxak Gersog hukumatni mamlakatda ommaviy noroziliklarga sabab bo‘lgan sud-huquq islohotini to‘xtatishga chaqirdi.
“Men bosh vazirga, hukumatga va koalitsiya aʼzolariga murojaat qilaman: hissiyotlar og‘ir va og‘riqli. Odamlar qattiq bezovta. Xavfsizlik, iqtisodiyot, jamiyat — hamma narsa xavf ostida. Isroil xalqining nigohi sizga qadalgan”, — dedi Gersog namoyishlar avj olgandan keyin.
26-mart kuni Isroil bosh vaziri Binyamin Netanyaxu sud-huquq islohotlarini tanqid qilgan mudofaa vaziri Yoav Gallantni ishdan bo‘shatdi, shundan so‘ng o‘tgan tunda mamlakatda yangi norozilik namoyishlari boshlandi.
Netanyaxu islohotlarni muzlatish imkoniyati haqida 27-mart kuni ertalab soat 5:00 gacha davom etgan muhokamada ishtirok etdi, endilikda uning omma oldida nutq so‘zlashi kutilmoqda.
Xalq sud islohotiga qarshi norozilik bildirmoqda
Dekabr oyi oxirida Isroilda yangi hukumat qasamyod qilgan edi. Bir yarim yil muxolifatda bo‘lganidan so‘ng bosh vazirlik lavozimiga qaytgan Netanyaxu Vazirlar Mahkamasining 33 a’zosini tanishtirdi, ular orasida o‘ngchi natsionalist diniy koalitsiyadan ham vakillar bor.
Adliya vazirligi rahbari Yariv Levin tomonidan taklif qilingan sud-huquq islohoti yangi Vazirlar Mahkamasining eng rezonansli tashabbuslaridan biri bo‘ldi. Uning fikricha, Oliy sud vakolatlari qonun va hukumat qarorlari bilan cheklanadi, Vazirlar Mahkamasi sudyalarni tanlash ustidan nazoratni ham o‘z qo‘liga oladi. Shunday qilib, biror qonun hatto Oliy sud tomonidan mamlakat konstitutsiyasiga zid deb topilsa ham, parlament uni qabul qilish imkoniyatiga ega bo‘ladi.
Muxolifatchilar bu islohot Isroilning demokratik qadriyatlariga tahdid soladi, deb hisoblamoqda. Mamlakatda ommaviy norozilik namoyishlari boshlandi.
Netanyaxu norozilik namoyishlarini muxolifatning uning saylovlardagi g‘alabasini tan olishdan bosh tortishi deb atadi. Yanvar oyi oxirida u rezonansga qaramay, islohot amalga oshirilishini e’lon qildi.
Izoh (0)