AQSHga kuchli tornado yopirildi, 26 kishi halok bo‘ldi (video)
AQSHning Missisipi shtatiga yopirilgan kuchli tornado oqibatida 26 kishi halok bo‘ldi, prezident Bayden shtatda favqulodda holat e’lon qildi. Bu haqda CNN xabar berdi.
Tornado yuzlab binolarni vayron qilgan va 100 mingdan ortiq aholini elektr energiyasiz qoldirgan. Tabiiy ofat oqibatida Silver-Siti va Rolling Fork shahri eng ko‘p zarar ko‘rgan. Undagi uylar xarobaga aylangan, daraxtlar ildizi bilan qo‘porilgan.
Rolling Fork shahar meri Eldrij Uokerning aytishicha, shahar endi yo‘q, ammo aholi uni qayta qurishi mumkin. Missisipi gubernatori Teyt Rivz tornado oqibatlarini fojia deb baholadi va hududda favqulodda holat e’lon qilinganini ma’lum qildi.
AQSH Milliy ob-havo xizmati ma’lumotlariga ko‘ra, tornado Rolling Fork ustidan o‘tganda soatiga 80 kilometr tezlikda harakatlangan. Tabiiy ofat qo‘shni Alabama va Tennessi shtatlariga ham ta’sir ko‘rsatgan.
