Fransiya Tashqi ishlar vazirligi Rossiyaning Belarus hududida taktik yadroviy qurollarini joylashtirish rejalarini qoraladi. Vazirlik Rossiya tomonini ushbu “beqarorlashtiruvchi kelishuv”ni qayta ko‘rib chiqishga chaqirdi.
“Fransiya Rossiyani yadro quroliga ega davlatdan kutiladigan masʼuliyatni ko‘rsatishga va Belarus bilan yadro qurolini joylashtirish bo‘yicha ushbu beqarorlashtiruvchi kelishuvdan chiqishga chaqiradi”, — deyiladi TIV bayonotida.
Vazirlik yadroviy mamlakatlar o‘rtasida tuzilgan yadro urushi va qurollanish poygasining oldini olish to‘g‘risidagi deklaratsiyani eslatdi.
“Fransiya 2022-yil 3-yanvardagi Vladimir Putin hamda ‘Katta beshlik’ning barcha davlat va hukumat rahbarlari tomonidan yadro urushi va qurollanish poygasining oldini olish to‘g‘risida tuzilgan deklaratsiyani amalga oshirishga katta ahamiyat berishini yana bir bor tasdiqlaydi. Biz Rossiyani yadro quroli egalaridan kutilayotgan mas’uliyatni namoyish etishga va bu beqarorlashtiruvchi kelishuvni qayta ko‘rib chiqishga chaqiramiz”, — deyiladi bayonotda.
25-mart kuni Rossiya prezidenti Vladimir Putin belaruslik hamkasbi Aleksandr Lukashenko bilan respublika hududida Rossiya yadro qurolini joylashtirish bo‘yicha kelishuvga erishganini e’lon qildi. Qo‘shma Shtatlar Vladimir Putinning bayonotidan keyin Amerika yadroviy kuchlarining tayyorgarligini o‘zgartirish uchun hech qanday sabab ko‘rmayotganini qayd etdi. Germaniya Rossiya prezidentining bayonotini “yadro bilan qo‘rqitishga yangi urinish” deb hisoblamoqda.
Yevropa diplomatiyasi rahbari Jozep Borrel, agar Rossiya Belarusda yadro qurolini joylashtirsa, unga qarshi sanksiyalar bilan tahdid qildi. Ukraina ushbu masala bo‘yicha BMT Xavfsizlik kengashining navbatdan tashqari yig‘ilishini chaqirishni talab qildi.
Izoh (0)