Rossiya urushga yollanuvchilarga frontda bosib o‘tgan har bir kilometri uchun 650 dollar taklif qilmoqda

Rossiyada bahorgi urushga safarbarlik kampaniyasi doirasida urushga yollanuvchilarga bosib o‘tgan har bir kilometr uchun 650 dollar mukofot taklif qilinmoqda. Kreml bu safarbarlikning navbatdagi bosqichidan qochishga yordam beradi deb umid qilmoqda. Bu haqda The Telegraph xabar berdi.

Hukumat veb-saytlari, davlat idoralari, tashkilotlari, jumladan, kutubxonalar va litseylarning ijtimoiy tarmoqlarida urushga yollanuvchilar uchun bir qator imtiyozlar taqdim etuvchi e’lonlar paydo bo‘lgan. Ulardan biri G‘arbiy Yaroslavl viloyatidagi munitsipal ma’muriyat tomonidan e’lon qilingan, xususan, urushga ro‘yxatdan o‘tish uchun taxminan 3 800 dollar miqdorida bir martalik bonus va’da qilgan.

Ularga Ukrainaga urushga yollangach oyiga 2500 dollargacha maosh, qo‘shimcha ravishda “faol hujumkor operatsiyalarda qatnashgani uchun” kuniga taxminan 100 dollar va “har bir kilometr oldinga siljigani” uchun 650 dollar va’da qilingan.

“Kreml Ukrainadagi to‘xtab qolgan urushi uchun yollanma askarlarga juda muhtoj, ammo safarbarlikning navbatdagi to‘lqinini oldini olishni xohlaydi. Sentabr oyida uning qisman safarbarligi o‘n minglab erkaklarning mamlakatni tark etishiga olib keldi”, — deyiladi xabarda.

Buning o‘rniga hukumat erkaklarni ko‘ngillilikka jalb qilishga umid qilmoqda. Xabarlarga ko‘ra, urushga yollovchilar munosib erkaklarni ro‘yxatdan o‘tishga chaqiradi, reklama taxtalariga istiqbolli imtiyozlar o‘rnatiladi, harbiy xizmatga chaqiruv idoralari talabalar hamda ishsizlarni jalb qilish uchun universitetlar va ijtimoiy xizmat agentliklari bilan hamkorlik qilmoqda.

Rossiya ommaviy axborot vositalarining xabar berishicha, butun mamlakat bo‘ylab erkaklar harbiy xizmatga chaqiruv idoralaridan chaqiruv xati olmoqda.  Moskvadan 250 chaqirim shimolda joylashgan Vologda shahrida chaqiruv qog‘ozi olgach, harbiy xizmatga kelgan erkaklar hududni tark etishni taqiqlovchi hujjatlarga imzo chekishga majbur bo‘lgani xabar qilingan.

Erkaklarga safarbarlikdan qochishga yordam beradigan guruh — Go by the Forest’ning aytishicha, erkaklar tomonidan chaqiruv qog‘ozlari yoki chaqiriluvchilarni ko‘rib chiqish bo‘yicha so‘rovlar so‘nggi oylarda kuniga o‘nlab kishidan 100 tagacha ko‘paygan.